COVID-19-ով պայմանավորված օրական ակտիվ դեպքերը նվազել են: Այս մասին մամուլի ասուլիսի ժամանակ հայտնել է Առողջապահության նախարար Անահիտ Ավանեսյանը։
Հիվանդության հերթական ալիքի նվազմանը զուգահեռ՝ ըստ նախարարի ռաջիկայում մահվան դեպքերը եւս կնվազեն:
Նոր «Օմիկրոն» շտամով պայմանավորված մինչև օրվա վերջ Հայաստանը մի շարք սահմանափակող միջոցառումներ կկիրառի:
«Ստանում ենք անհանգստացնող նորություններ, որ վարակը շարունակում է մուտացվել: Հայտնաբերվում են նոր շտամներ, որոնք տարբերվում են նախորդներից տարածման ակտիվությամբ: Հարավաֆրիկյան Հանրապետությունում հայտնաբերված «Օմիկրոն» շտամն ունի փոխակերպման բարձր աստիճան. այն 50 մուտացիա է կրում, որից 30-ը` սպայկային սպիտակուցում», – նշել է նախարարը։
Նախարարը նշել է նաեւ, որ նոր շտամով պայմանավորված ժամանակավորապես կսահմանափակվի մուտքը Հայաստանի Հանրապետություն մի շարք երկրներից` Հարավային Աֆրիկայի Հանարպետությունից, Բոտսվանայի Հանրապետությունից, Լեսոթոյի Թագավորությունից, Նամիբիայի Հանրապետությունից, Զիմբաբվեի Հանրապետությունից, Մոզամբիկի Հանրապետությունից, Մադագասկարից և Տանզանիայից: