Այսօր Հայաստանի Հանրապետության և Արցախի ազգային հերոս Մոնթե Մելքոնյանը կդառնար 65 տարեկան։ Մոնթեն ակտիվ մասնակցություն է ունեցել Արցախի առաջին պատերազմի ժամանակ։ 1992 թվականին Մոնթեն ստանձնում է Արցախի Մարտունու պաշտպանական շրջանի շտաբի պետի պարտականությունը։ Նրա ղեկավարությամբ Մարտունին դարձավ Արցախի ամենապաշտպանված ու ամենամարտունակ շրջանը։ 1993 թվականի մարտ-ապրիլ ամիսներին նրա ղեկավարությամբ ազատագրվեց նաև Քարվաճառը։ Մ. Մելքոնյանը մասնակցել է ՀՀ Իջևանի, Ճամբարակի, ԼՂՀ Շահումյանի (Էրքեջ, Բուզլուխ, Մանաշիդ, Կարաչինար), Մարտակերտի, շրջանների ինքնապաշտպանական և ազատագրական մարտերին։
«Եթե պարտվենք պատերազմը Արցախում, պատերազմը չի վերջանա, Ադրբեջանը պատերազմը կշարունակի Զանգեզուրի համար, իսկ եթե Զանգեզուրը վերցնեն, ապա շատ դժվար է հավատալ, որ Հայաստանը որպես երկիր կգոյատևի»։ Սա ասել է Մոնթեն՝ Արցախի առաջին պատերազմի ժամանակ։
Մոնթեն զոհվել է խորհրդավոր հանգամանքներում, 1993 թվականի հունիսի 12-ին։ Մոնթեն «երկրորդ» անգամ սպանվեց 2020 թվականի նոյեմբերի 25-ին, երբ ըստ 2020 թվականի նոյեմբերի 9-ի եռակողմ (Հայաստան-Ադրբեջան-Ռուսաստան) համաձայնությամբ` Ադրբեջանին հանձնվեց Մոնթեի ազատագրած Քարվաճառը։
Մոնթեի դեմ արշավը շարունակվում է նաև այսօր։ Որոշ հայտնի սոցիալական ցանցեր՝ այդ թվում «Facebook»-ը, արգելափակում է այն բոլոր հաշիվներն ու էջերը, որոնցում նշվում է Մոնթեի անունը, կամ տեաղադրվում է նրա նկարը։