Հայաստանի համար սկզբունքային նշանակություն ունեն Լեռնային Ղարաբաղի ժողովրդի անվտանգության երաշխիքները, նրանց իրավունքների և ազատությունների պաշտպանությունը, ինչպես նաև ԼՂ վերջնական կարգավիճակի ճշգրտումը. այս հարցերը ընդգրկված են խաղաղության օրակարգի վերաբերյալ հայկական կողմի պատասխաններում և պետք է դառնան բանակցությունների առարկա: Կառավարության նիստի ընթացքում՝ անդրադառնալով Ադրբեջանի հետ խաղաղության պայմանագրին, նշել է վարչապետ Նիկոլ Փաշինյանը:
«Հանդիպման արդյունքներում 2 հարցի վերաբերյալ կայացվել է որոշում: Առաջինը՝ երկու երկրների արտգործնախարարներին հանձնարարվել է սկսել ապագա խաղաղության պայմանգրի նախապատրաստական աշխատանքները և այս ուղղությամբ ձեռնարկել բանակցություններ և շփումներ: Սա նշանակում է, որ խաղաղության պայմանագրի վերաբերյալ Հայաստանի և Ադրբեջանի ներկայացրած սկզբունքները և հարցերը պետք է իմի բերվեն և բանակցությունների արդյունքներով հասցեագրեն»,-ասաց Փաշինյանը:
Փաշինյանը հիշեցրեց՝ հայկական կողմը, ինչպես նախկինում, այնպես էլ հիմա, այս գործընթացում էական է համարում ԵԱՀԿ Մինսկի խմբի համանախագահության ներգրավվածությունը, և պետք է շարունակել աշխատել այդ ուղղությամբ: Բրյուսելում քննարկվել է նաեւ Արցախի Փառուխ գյուղի շուրջ տեղի ունբեցած իրադարձություններին: Սակայն ըստ Փաշինյանի, այդ քննարկումները չեն հանգեցրել միասնական գնահատականի:
«Մեզ համար սկզբունքային նշանակություն ունեն ԼՂ ժողովրդի անվտանգության երաշխիքները, նրանց իրավունքների և ազատությունների պաշտպանությունը, ինչպես նաև ԼՂ վերջնական կարգավիճակի ճշգրտումը: Այս հարցերը ընդգրկված են խաղաղության օրակարգի վերաբերյալ մեր պատասխաններում և պետք է դառնան բանակցությունների առարկա»,-ասաց վարչապետը:
Բրյուսելի հանդիպման հաջորդ որոշումը վերաբերում էր մինչև ապրիլի վերջ Հայաստան-Ադրբեջան սահմանների դելիմիտացիայի հարցերով երկկողմ հանձնաժողով ստեղծելու մասին էր: Վարչապետի խոսքով այդ հանձնաժողովը կունենա կրկնակի մանդատ՝ դելիմիտացիայի եւ սահմանի երկայնքով անվտանգության և կայունության ապահովման:
«Այս թեմայով քննարկումները, այդ թվում ՌԴ-ի միջնորդությամբ, տեղի են ունենում շուրջ 1 տարի: Եվ ի վերջո այդպիսի կոմպրոմիսային որոշման հանգեցինք: Գիտեք, որ ՀՀ տարածքներ կան, որոնք գտնվում են Ադրբեջանի վերահսկողության ներքո, կան Ադրբեջանի տարածքներ, որոնք Հայաստանի վերահսկողության ներքո են: Այս հարցերը պետք է լուծվեն բանակցությունների արդյունքներով, բնականաբար դե յուրե հիմնավորված արձանագրումների, իրավական նշանակություն ունեցող փաստերի հիման վրա»,-ասաց Փաշինյանը:
Նիկոլ Փաշինյանը հավելեց սահմանագծման և սահմանազատման աշխատանքներին աջակցություն ցուցաբերելու պատրաստակամություն է հայտնել Ռուսաստանը, այս հարցում Եվրամիությունը նույնպես աջակցելու պատրաստակամություն է հայտնել:
«Մեր դիրքորոշումն այն է, որ Հայաստանի և Ադրբեջանի միջև դե յուր սահման գոյություն ունի, և դա խորհրդային ժամանակներում գոյություն ունեցող սահմանագիծն է: Այս արձանագրմամբ սահմանագծման աշխատանքները պետք է սկսել և փորձել լուծումների հասնել՝ զուգահեռ միջոցներ ձեռնարկելով անվտանգության և կայունության ապահովման ուղղությամբ»,-ասաց վարչապետը:
Գնահատելով Բրյուսելի եռակողմ հանդիպումը Նիկոլ Փաշինյանը նշեց՝ առաջ շարժվելու համաձայնություն է ձեռք բերվել: Ըստ վարչապետի՝ հետևողականորեն շարունակելու են առաջ տանել երկրի և տարածաշրջանի համար խաղաղ զարգացման դարաշրջան բացելու օրակարգը: