Սահմանային խնդիրը պետք է լուծվի խաղաղ ճանապարհով, այս մասին Գեղարքունիքի մարզում նախընտրական հանդիպման ժամանակ այսօր հայտարարել է վարչապետի պաշտոնակատար Նիկոլ Փաշինյանը։
«Գեղարքունիքի մարզում և Սոթք-Խոզնավար հատվածում ստեղծված իրադրության մասին մենք մեր դիրքորոշումը հայտնել ենք։ Խնդիրը պետք է լուծվի խաղաղ ճանապարհով և մեր միջազգային գործընկերների ներգրավմամբ։ Այս օրերին մենք շատ ակտիվ քննարկումների և գործակցության մեջ ենք Ռուսաստանի Դաշնության հետ։ Նրանք լայնորեն ներգրավված են, և մենք ըստ էության քայլ առ քայլ գնում ենք այդ խնդրի հանգուցալուծմանը»,- ասաց Փաշինյանը։
Նիկոլ Փաշինյանի խոսքով՝ միաժամանակ աշխատանք է տարվում միջազգային այլ գործընկերների հետ՝ ԵԱՀԿ Մինսկի խմբի համանախագահության շրջանակներում։
Հիշեցնենք, որ մայիսի 12-ից ադրբեջանական զինված ուժերը ներխուժել են ՀՀ տարածք՝ Գեղարքունիքի և Սյունիքի մարզերի մի շարք բնակավայրերի վարչական տարածքներ։
