ԱԺ-Կառավարություն հարցուպատասխանի ժամանակ Պաշտպանության նախարար Սուրեն Պապիկյանը՝ անդրադարձել է հարցին, թե արդյոք «Պաշտպան հայրենյաց» ծրագրով պայմանագրային զինծառայողները հնարավորություն ունեն իրենց ծառայությունն իրականացնել իրենց բնակավայրերին մոտ:
«Այո՛ հնարավոր է ընտրել ծառայության վայրը: Առավելությունը պետք է տրվի այն զինծառայողներին, ովքեր բնակվում են սահմանամերձ բնակավայրերում: Այսինքն, եթե զինծառայողի բնակության վայրում կա մարտական հերթապահություն իրականացնող զորամաս, նա կարող է զեկուցագիր գրել ըստ վերադասության և ղեկավարությունը կընդառաջի և նա իր հերթապահությունը կանցկացնի իր բնակավայրին մոտ»,- նշեց Սուրեն Պապիկյանը:
Նախարարի խոսքով՝ հիմա կարգը հստակեցվում է և մեխանիզմն ավելի կպարզեցնեն ու բոլորին ավելի հասանելի կդարձնեն.
«Մենք նաև աշխատելու ենք, հնարավորության դեպքում ծնողների հետ, զինծառայողների հետ՝ այս ամենն ավելի պարզ նրանց մատուցելու համար: Բայց մի բան հստակ է՝ այո՛ հնարավորություն կա պայմանագրային դառնալուց հետո, օրինակ՝ դիցուկ 6 ամիս ծառայած զինծառայողը պայմանագիր կնքելուց հետո հնարավորություն ունի վերադառնալ իր բնակավայրին մոտ և իր հետագա հնգամյա պայմանագրային ծառայությունն անցկացնել այդտեղ, այդ զորամասում և պաշտպանել իր մարզի, իր քաղաքի իր բնակավայրի սահմանները»,-ասաց Պաշտպանության նախարարը:
