Ակտիվ երաժշտական ռիթմեր, պարող երիտասարդներ ու անտառային մայրամուտի տեսարան: Ջրվեժի անտառում գտնվող «Շէնէ» հարթակում տեղի ունեցավ ռուսական «Пицца» խմբի համերգը:
Բացօթյա համերգին ներկա էին հայ եւ այլազգի բազմաթիվ երաժշտասերներ: Հանդիսատեսը ջերմ ծափերով ձայնակցում էր խմբի անդամներին, իսկ համերգային ծրագրից առաջ եւ հետո ունկնդրում ու պարում Dj Jokey-ի և Dj Nacontrole-ի հնչեցրած ռիթմերի ներքո, զուգահեռ էլ վայելում անտառային մայրամուտը: Համերգային երեկոյի կազմակերպիչներն արել էին առավելագույնը՝ երաժշտական տոն ստեղծելու համար:
Խմբի հիմնադիր, վոկալիստ Սերգեյ Պրիկազչիկովը բեմից ջերմորեն շփվում էր հանդիսատեսի հետ, նշում, որ հիացած է հայ երկրպագուների ջերմ ընդունելությամբ ու մայրամուտի տեսարանով:
«Пицца» երաժշտական խումբը ստեղծագործում է փոփ-սոուլ, ռեգգի, ֆանկ ժանրերում։ «Оружие» ստեղծագործությունն իսկական հիթ է, որը տարիներ առաջ չէր իջնում տարբեր հիթ շքերթների առաջին հորիզոնականներից: Խումբն այն կատարեց երկու անգամ՝ եզրափակելով համերգային հատվածը: Նաև երգեցին հայտնի «Лифт»,
«Карусель», «Хоп Хэй Лала Лэй», «Лети» ու այլ երգեր:
Առաջիկայում յուրաքանչյուր ուրբաթ և շաբաթ օրերին «Շէնէ»-ում սպասվում են հետաքրքիր երաժշտական երեկոներ՝ հայտնի դիջեյների, հայաստանյան և արտասահմանյան արտիստների մասնակցությամբ:
Հեղինակ՝ Ալինա Ստեփանյան
Լուսանկարները՝ Գև Ավետիսյանի եւ հեղինակի