ԿԳՄՍ փոխնախարար Կարեն Գիլոյանը այսօր՝ սեպտեմբերի 11-ին, ԱԺ ութերորդ գումարման վեցերորդ նստաշրջանում ներկայացրեց առաջարկ Ծիծեռնակաբերդի խճուղի 5 հասցեում գտնվող մարզակառույցը մասնավորեցման ցուցակից հանելու և ԿԳՄՍ նախարարությանը հանձնելու մասին:
Փոխնախարարը տեղեկացրեց, որ նախատեսում են հիմնել նաև առողջավերականգնողական կենտրոն մարզիկների համար:
«Այսօր արդեն հայկական սպորտը դարձել է հետաքրքիր ներդրողների համար, և մի քանի ծրագրերով դիմել են մեզ այդ կենտրոնը կառուցելու»,- նշեց Կարեն Գիլոյանը:
«Քաղաքացիական պայմանագիր» խմբակցության պատգամավոր Սիսակ Գաբրիելյանի դիտարկմանը՝ պետք է օր առաջ մտածել առնվազն 30.000 նստատեղ ունեցող ֆուտբոլային մարզադաշտ ունենալու մասին, ԿԳՄՍ փոխնախարարն արձագանքեց. «Դա հանապազօրյա խնդիր է, և Հայաստանի հավաքականի՝ հպարտություն ներշնչող խաղի ֆոնին այսօր այնպիսի պահանջարկ է առաջացել, որ ես ձեզ վստահեցնում եմ՝ հանրապետության կեսը ինձնից նեղացած է այս պահին, որ տոմս չեմ կարողանում տալ, բայց ստադիոնի չափն է այդքան»: