Միացյալ Նահանգները խորապես մտահոգված է Լեռնային Ղարաբաղում հումանիտար իրավիճակի վատթարացմամբ՝ սննդամթերքի, դեղորայքի և արժանապատիվ գոյության համար կարևոր այլ ապրանքների շարունակական շրջափակման հետևանքով։ Այս մասին ասվում է ԱՄՆ Պետդեպարտամենտի հայտարարության մեջ։
Պետքարտուղարությունը նշում է, որ վերջին շաբաթների ընթացքում Միացյալ Նահանգներն աշխատում է կողմերի հետ՝ ապահովելու, որ մարդասիրական օգնությունը հնարավոր լինի հասցնել Լեռնային Ղարաբաղի ժողովրդին։
«Մենք կրկնում ենք մեր կոչը՝ անհապաղ բացել Լաչինի միջանցքը մարդասիրական, առևտրային և ուղևորափոխադրումների համար։ Բացի այդ, Բաքվի պաշտոնյաները և Ստեփանակերտի ներկայացուցիչները պետք է անհապաղ հավաքվեն՝ համաձայնեցնելու Լեռնային Ղարաբաղի տղամարդկանց, կանանց և երեխաների համար անհրաժեշտ սննդամթերքի փոխադրման ուղիները, ներառյալ մատակարարման լրացուցիչ ուղիները, և վերսկսեն քննարկումները բոլոր չմարված հարցերի շուրջ: Հիմնական հումանիտար օգնությունը երբեք չպետք է պատանդ մնա քաղաքական երկպառակություններին»,- ասված է հայտարարության մեջ:
