ՄԻՊ աշխատակազմին հատկացված շինությունները յուրաքանչյուր քաղաքացու համար պետք է մատչելի լինեն։ Այս մասին ասել է ՀՀ մարդու իրավունքների պաշտպան Անահիտ Մանասյանը։
«Արդյունավետ աշխատանքի գրավականներից է շենքային պայմանների մատչելիությունը։ Մարդու իրավունքների պաշտպանի աշխատակազմին հատկացված շինությունները, այդ թվում՝ մարզային ստորաբաժանումները, պետք է հարմարեցված լինեն մեզ դիմող յուրաքանչյուր քաղաքացու, այդ թվում՝ հաշմանդամություն ունեցող անձանց կարիքներին: Հուլիսի 12-ին աշխատակազմի հետ անցկացված խորհրդակցության ժամանակ հայտարարել է Մարդու իրավունքների պաշտպան Անահիտ Մանասյանը:
Մասնավորապես, կարևոր է խորհրդատվության համար նախատեսված սենյակների առկայությունը, որտեղ քաղաքացիներն աշխատակազմի հետ կարող են առանձնազրույցներ ունենալ՝ առանց երրորդ անձի մասնակցության։ Որպես հրատապ հարց՝ Պաշտպանն ընդգծել է նաև մարզային ստորաբաժանումներում աշխատանքների իրականացման կարևորությունը։ Այս համատեքստում նա հատուկ անդրադարձել է Լոռու մարզային ստորաբաժանմանը, որի բացման արարողությունը տեղի է ունեցել սույն թվականի հուլիսի 4-ին, սակայն թեքահարթակը դեռ չի տեղադրվել։
Պաշտպանի լիազորություններն ստանձնելուց հետո աշխատակազմում իրականացվել է ուսումնասիրություն, առկա խնդիրները հավաքագրվել են՝ կարճ ժամանակում լուծում տալու նպատակով։ Ֆինանսականից մինչև անհրաժեշտ աշխատուժ. տեղեկատվությունն արդեն ամփոփման փուլում է, լուծման տարբերակների մշակման գործում ներգրավվելու են մասնագետներ։ Խորհրդակցության շրջանակում քննարկվել են աշխատանքային մեխանիզմներին վերաբերելի մի շարք հարցեր, տրվել են հանձնարարականներ»,- ասված է հաղորդագրության մեջ։
