Ուշադրություն դարձրեք՝ ոչ թե նոյեմբերի 9-ի կեսգիշերին, այլ նոյեմբերի 8-ի լույս 9-ի առավոտյան եմ եռակողմ հայտարարության տեքստն ստորագրել»,- հայտարարել է վարչապետ Նիկոլ Փաշինյանը՝ մանրամասներ ներկայացնելով 2020-ի պատերազմը դադարեցնելու ուղղությամբ բանակցություններից։
Նրա խոսքով՝ այդ բանակցությունները նա վարել է ՌԴ նախագահ Վլադիմիր Պուտինի միջոցով. «Նոյեմբերի 8-ին և 9-ին նրա հետ ունեցել եմ շուրջ 20, պատերազմի ողջ ընթացքում՝ շուրջ 60 հեռախոսային խոսակցություն»։
Վարչապետը հայտնել է, որ հայկական կողմն առաջարկել է Աղդամը՝ Հադրութի դիմաց. «Վերջ ի վերջո, քննարկումների արդյունքում հասանք մի տեքստի, որտեղ ոչինչ չէր ասվում Շուշիի մասին, Հայաստանի տարածքով միջանցք ստեղծելու մասին, այլ խոսվում էր ռազմական գործողությունների դադարի, 7 շրջանի վերադարձի, Լաչինի միջանցք ստեղծելու, այդտեղ և ԼՂ-ում ռուս խաղաղապահների տեղակայման մասին։ Նոյեմբերի 9-ի առավոտյան ես ստորագրեցի այդ տեքստը»,- ասաց նա՝ ուշադրություն հրավիրելով, որ եռակողմ հայտարարության տեքստը ստորագրել է ոչ թե նոյեմբերի 9-ի կեսգիշերին, այլ առավոտյան. «Պարզվեց, որ Ադրբեջանն այդ տեքստը չի ստորագրում և առաջ է քաշում մի շարք նոր պահանջներ։ Գործընթացի կուլմինացիան նոյեմբերի 9-ի երեկոյան էր, երբ պարզվեց, որ Ադրբեջանը գործնականում համաձայնեցված տեքստին նոր լրացումներ է առաջարկում»։ Նա տեղեկացրեց, թե ստորագրված տեքստը շրջանառությունից դուրս է եկել, հետո նորից են բանակցել. «Այն պահին, երբ ՌԴ նախագահն ասաց, որ Ադրբեջանն առաջարկում է տեքստի մեջ ավելացնել Տավուշի անկլավների վերադարձի մասին կետ, ես հայտարարեցի, որ բացառվում է այդպիսի փաստաթուղթ ստորագրել։ Պաշտոնապես արձանագրվեց, որ մենք փաստաթուղթ չենք ստորագրում։ Որոշ ժամանակ անց պարզվեց, որ համաձայնություն է ձեռք բերվել՝ հանել այդ կետը փաստաթղթից, զուգահեռ, կեսգիշերին մոտ սկսեցին լուրեր գալ մարտական գործողությունների ակտիվացման և այն մասին, որ Ստեփանակերտի երկնքում մեծ թվով աթս-ներ կան։ Ի վերջո բարդ, տևական քննարկումներից հետո ես ստորագրեցի այն փաստաթուղթը, որ հայտնի է բոլորին, որն, իհարկե, ավելի վատն էր, քան առավոտվա տարբերակը, բայց ավելի լավն էր առաջարկվող մյուս տարբերակներից, որոնցից մեկը Մեղրիի միջանցք էր նախատեսում, մյուսը՝ Տավուշի անկլավների վերադարձ»։
