Գրանադայում սպասվող հնգակողմ հանդիպման օրակարգի առանցքային հարցերից մեկը, եթե ոչ առանցքային հարցը, ըստ ամենայնի լինելու է նոյեմբերի 9-ի հայտարարության 9-րդ կետի չեղարկման գնալը, այդպիսով Ռուսաստանին զրկելով Թուրքիայի եւ Ադրբեջանի միջեւ բեռնափոխադրումների վերահսկողության «հիմքից»: Այս մասին Ֆեյսբուքում գրել է քաղաքական վերլուծաբան ՀԱկոբ Բադալյանը։
«Ըստ ամենայնի, հենց այդ նպատակով տրամադրություն շոշափելու խնդիր էր լուծում Հայաստանում Ֆրանսիայի դեսպանի հանդիպումը Հայաստանում Իրանի դեսպանի հետ: Իսկ երեկ էլ Իրանի դեսպանին ընդունել է Հայաստանի վարչապետը:
Իրանի դիրքորոշումից կախված է շատ բան:
Բոլոր դեպքերում, նոյեմբերի 9-ի 9-րդ կետի չեղարկման ուղղությամբ առարկայական քայլերը, որ կկատարվեն Գրանադայում, հեռանկարում մեծ հավանականությամբ ունենալու են «պրահյան էֆեկտ», որի ողբերգական հետեւանքը տեսանք Արցախում: Այսինքն, չափազանց կուժգնանա ռիսկը, որ 9-րդ կետը կիրագործվի պատերազմով, եւ որպես դաժան կանոն՝ մի կամ մի քանի բան էլ ավելին:
Սա մեզ համար լրջագույն մտորումների առիթ է, որպեսզի վերջում բոլորը՝ բառացիորեն բոլորը չստանան ինչ ուզում են, իսկ մենք միայն նոր զոհեր, նոր ողբ:
Ինքնիշխանության եւ անկախության մասին սեղանապետության հարցում չեմ զիջի որեւէ մեկին, չկասկածեք:
Կարեւոր է առնվազն կասկածել նախանշվող ճանապարհով դրան գնալու իրատեսությանն ու հնարավորությանը»,- գրել է Հակոբ Բադալյանը:
