Արտաշատի համալիր մարզադպրոցում արդեն երկրորդ անգամ կայացավ Արցախյան 44-օրյա պատերազմի նահատակ, աթլետ Գեղամ Գրիգորյանին նվիրված աթլետիակայի
հուշամրցաշարը:
Արտաշատ համայնքի Դալար բնակավայրում է ծնվել Գեղամը, ով իր մարզական ուղին անցել է Արտաշատի համալիր մարզադպրոցում, աթլետիկայի Հայաստանի առաջնությունների բազմակի մրցանակակիր է: Սակայն պատերազմը խլեց նրա կյանքը:
Առաջնության բացման արարողությանը ներկա էին Արտաշատի համայնքապետ Կառլեն Մկրտչյանը, Գեղամի հայրը՝ Գարեգին Գրիգորյանը, համայնքապետարանի ԿՄՍԵ բաժնի պետ Անահիտ Խաչատրյանը, մարզիկներ մարզասերներ:
Համայնքի ղեկավարն իր խոնարհումը բերեց Գեղամի ու մյուս բոլոր անմահների հիշատակին՝ նշելով, որ նմանատիպ միջոցառումները հարգանքի ու ոգեկոչման արարողություն են քաջերի հիշատակին: Հետագա սերունդները պետք է հիշեն ու դաստիարակվեն հերոս տղաների սխրագործություններով:
Առաջնությանը մասնակցում էին 100-ից ավելի աթլետներ, Երևանից, Արտաշատ, Գյումրի, Վանաձոր, Անի համայնքներից:
Վերջիններս թեժ ու դիտարժան մրցաշարերում պայքարեցին 100 մ վազք, գնդի հրում, նիզակի նետում, հեռացատկ մարզաձևերում: Արտաշատցի մարզիկները լավ արդյունքներ գրանցեցին:
Գնդի հրում և նիզակի նետում մարզաձևերում աղջիկների պայքարում 1-ին պատվավոր հորիզոնականները զբաղեցրեց մեր մարզուհի Սուսաննա Բաբայանը, Միլենա Բալասանյանը՝ 3-րդ հորիզոնականը:
Տղաների պայքարում նիզակի նետում մրցաձևում 1-ին հորիզոնականը նվաճեց Այվազ Սահակյանը, նույն մարզաձևում մեր մարզիկ Դավիթ Միրզոյանը 3-րդ հորիզոնականը կիսեց անեցի Կարեն Մանասյանի հետ:
Գնդի հրում մարզաձևի տղաների պայքարում Նորայր Խաչատրյանը և Այվազ Սահակյանը գրավեցին համապատասխանաբար 2-րդ և 3-րդ հորիզոնականները: 100 մ վազքում Գևորգ Խաչատրյանը նվաճեց 2-րդ, իսկ հեռացատկ մարզաձևում Ռոբերտ Պողոսյանը՝ 3-րդ հորիզոնականը։Հաղթողները պարգևատրվեցին գավաթով, մեդալներով և պատվոգրերով:
Հեղինակ ՝ Ալեքսանյան Մարինկա
