ԱԻ նախկին նախարար, ՔՊ վարչության անդամ Արմեն Փամբուխչյանն անդրադարձել է Երևանի ավագանու ընտրություններին՝ նշելով, որ իրեն է վստահվել ղեկավարել կուսակցության նախընտրական շտաբը։ Փամբուխչյանը նաև հիշեցրել է, որ ինքն այլևս նախարար չի լինելու, քանի որ օրենքով դադարեցվում է ԱԻՆ գործունեությունը․
«Դա նույնպես բարձր պատասխանատվություն ու վստահություն է, որովհետև Երևանի ընտրությունները կարևոր են, և ես, լինելով ՔՊ վարչության անդամ, պետք է ղեկավարեմ այդ շտաբը»,- ասաց Փամբուխչյանը։
Իսկ թե ինչով կզբաղվի ընտրություններից հետո՝ նա նշել է, թե որևէ քննարկում չկա. «Ներկա պահին կա քաղաքական որոշում, որ ես ղեկավարեմ նախընտրական շտաբը։ Իսկ վաղվանից արդեն նախապատրաստական աշխատանքները պետք է սկսեմ»։
Խոսելով իշխանության վարկանիշի մասին՝ Փամբուխչյանն ասել է, որ ՔՊ-ն ունի բավական մեծ ռեյտինգ՝ ի դեմս մեր թեկնածու Տիգրան Ավինյանի։
