ԼՂ նախկին պետնախարար Ռուբեն Վարդանյանի կինը` Վերոնիկա Զոնաբենդը հաստատել է ամուսնու ձերբակալության լուրը։
Ռուբեն Վարդանյանի տելեգրամյան ալիքում քիչ առաջ հրապարակվել է Վերոնիկա Զոնաբենդի հայտարարությունը. «Այսօր առավոտյան ամուսինս՝ բարերար, գործարար և Արցախի Հանրապետության նախկին պետնախարար Ռուբեն Վարդանյանը, ձերբակալվել և գերեվարվել է ադրբեջանական իշխանությունների կողմից սահմանին՝ ադրբեջանական օկուպացիայից փախչող հազարավոր այլ հայերի հետ միասին Արցախը լքելու փորձի ժամանակ։
Շրջափակման բոլոր տասը ամիսները Ռուբենը արցախցիների հետ ուս ուսի կանգնած էր, զրկանքներ էր կրում և նրանց հետ պայքարում գոյատևելու համար։
Ես աղոթում եմ, որ ամուսինս ազատ արձակվի անվնաս և խնդրում եմ ձեր աջակցությունը»,- ասված է հայտարարության մեջ։
Ավելի վաղ Վարդանյանի կինը ասել էր, թե ամուսնու հետ կապը կորել է։
