Falcon 9 կրող հրթիռը հաջողությամբ ուղեծիր է դուրս բերել 48 մինի-արբանյակների հերթական խմբաքանակը՝ Starlink համակարգի ինտերնետ-ծածկույթի գլոբալ ցանցի ուղեծրային խմբավորումը համալրելու համար: «Արմենպրես»-ի հաղորդմամբ՝ այս մասին հայտնել է SpaceX ընկերությունը:
«48 Starlink արբանյակների դուրսբերումը հաստատվել է», – ասվում է հաղորդագրության մեջ:
Արձակումն իրականացվել է հուլիսի 7-ին Կալիֆորնիայի Վանդենբերգ Ամերիկյան տիեզերական ուժերի բազայի հարթակից:
Սա Starlink նախագծի շրջանակներում 2019 թվականի մայիսից ի վեր ինտերնետային արբանյակների թվով 92-րդ արձակումն էր, իսկ ընթացիկ տարվա սկզբից ՝ 23-րդը: Հաշվի առնելով ներկայիս գործարկումը ՝ SpaceX-ն արդեն ուղեծիր է դուրս բերել ավելի քան 4,7 հազար նման արբանյակ: Դրանց մի մասը շարքից դուրս է եկել կամ դուրս է եկել ուղեծրից: Ավելի քան 4,4 հազար սարքեր մնում են աշխատանքային վիճակում:
