ԱԺ-ում շարունակվում է ՀՀ պաշտպանության նախկին նախարար, «Հայաստան» խմբակցության ղեկավար Սեյրան Օհանյանի նկատմամբ քրեական հետապնդում հարուցելու համաձայնություն ստանալու մասին երրորդ միջնորդության քննարկումը։
ՀՀ գլխավոր դատախազ Աննա Վարդապետյանը ներկայացրեց միջնորդությունը՝ տեղեկացնելով, որ Օհանյանը խմբային շահերից ելնելով պաշտոնական դիրքն օգտագործել է ծառայության շահերից հակառակ, չի կատարել իր ծառայողական պարտականությունները, որն անզգուշությամբ առաջացրել է ծանր հետևանքներ։
Ըստ դատախազի՝ մասնավոր ընկերության հետ կնքվել է պետության համար ոչ շահեկան, իսկ հանցավոր խմբի անդամների համար քաղաքացիաիրավական հարաբերությունների տիրույթում ակնհայտ առավելություններ ընձեռող դրույթներ պարունակող պայմանագիր: Դրա հետևանքով պետությունը զրկվել է պայմանագրային պարտավորությունները խախտելու դեպքում դրանց վերականգնման ուղղությամբ արդյունավետ միջոցներ ձեռնարկելու հնարավորությունից: Դատախազը նաև տեղեկացրեց, որ նպաստավոր պայմաններ են ստեղծվել պայմանագրային պարտավորությունները չկատարելու պայմաններում գրավադրել պայմանագրի առարկա հանդիսացող գույքերը և հափշտակել գրավադրման արդյունքում ստացված գումարի զգալի մասը՝ 1 միլիարդ 83 միլիոն 890 հազար դրամի չափով։
