Թուրքիան դուրս է եկել կանանց նկատմամբ բռնության դեմ պայքարի Ստամբուլյան կոնվենցիայից, քանի որ դրա հիմնական էությունը փոփոխվել է. այն օգտագործվում է «համասեռամոլությունը նորմալացնելու» համար, նշել են նախագահ Էրդողանի մամուլի ծառայությունից, փոխանցում է Anadolu-ն:
«Մի խումբ մարդիկ են ստանձնել կանանց իրավունքների պաշտպանությունը և փորձում են նորմալացնել համասեռամոլությունը: Դա անհամատեղելի է Թուրքիայի սոցիալական և ընտանեկան արժեքների հետ», – հայտնել են հասարակայնության հետ կապերի վարչությունից:
Թուրքիայի դուրս գալը «ոչ մի կերպ չի նշանակում», որ երկիրը վտանգում է կանանց պաշտպանությունը, այլ հակառակը. դա ցույց է տալիս, որ երկիրը բարեփոխումներ է իրականացնելու՝ կանանց դեմ աճող բռնության դեմ պայքարելու համար:
Կոնվենցիան ընդունվել է 2011 թվականին: Այն դարձել է ընտանեկան բռնության դեմ պայքարի առաջին եվրոպական համաձայնագիրը: Թուրքիան առաջին երկիրն էր, որը վավերացրել էր այն: Երկիրը նախօրեին հայտարարել էր կանանց նկատմամբ բռնության կանխարգելման և դրա դեմ պայքարի մասին Եվրոպայի խորհրդի Ստամբուլյան կոնվենցիայից դուրս գալու մասին:
