Այս պահին գազի սակագնի վերանայման հայտ հանրային ծառայությունները կարգավորող հանձնաժողովը չի ստացել: Սակայն ջերմատվության հետ պայմանավորված գազի թանկացում նախատեսվում է: Այս մասին հայտարարել է հանարային ծառայությունները կարգավորող հանձնաժողովի նախագահ Հովհաննես Բաղրամյանը
«Երբ որ հայտարարվում է գազի գինը սահմանին, այդ բացարձակ մեծությունը կախված է լինում գազի ջերմատվությունից: Ջերմատվության փաստացի ճշգրտման մեխանիզմները ընդունված են եղել դեռեւս 2013 թվականին, սակայն այդ մեխանիզմները տարբեր պայմանավորվածություններով առայսօր չեն գործել: Սակայն դեռեւս նախորդ տարի Հայաստան-Ռուսաստան միջգերատեսչական հանձնաժողովը արձանագրություն էր ընդունել, ըստ որի 10 տարի ժամանակով սահմանին գազի գինը կմնա անփոփոխ, սակայն նույն փաստաթղթով պայման էր դրված, որ մինչեւ այս տարվա ապրիլի մեկը պետք է համաձայնեցվեն գազի ջերմատվության հետ կապված հարցերը: Առնվազն այդ մասով հնարավոր է սակագնի փոփոխություն լինի, բայց առայժմ հանձնաժողովը հայտ չի ստացել»,- ասաց Բաղրամյանը:
Այսօր Հայաստանը գազ է ստանում 165 դոլարով, որը նախատեսված է 7900 կլիոկալորիա ջերմատվության համար: Սակայն ըստ հանձնաժողովի նախագահի Հայաստանին մատակարարվող գազի ջերմատվությունը այսօր փաստացի 8300 կիլոկալորիայի սահմաններում է, հետեւաբար գազի սակագինը հնարավոր է փոխվի հաշվի առնելով այդ գործոնը:
Փաստացի ստացվում է, որ գազի ջերմատվությունը խոշոր հաշվով մնում է նույնը: Առաջին հայացքից Ռուսաստանը, որը Հայաստանի հիմնական գազամատակարարն է, գազի գինը սահմանին չի բարձրացնում, սակայն որոշել է կիրառել այլ մեխանիզմ, որն ուղղակի հարվածելու է Հայաստանի սպառողների գրպանին: