Եվրոպական խորհրդարանի արտաքին հարաբերությունների հանձնաժողովը պատրաստել է Հայաստանի հետ Եվրամիության հարաբերությունները վերանայող նոր զեկույց, որում Ադրբեջանին կոչ է արվում դուրս բերել զորքերը ՀՀ ինքնիշխան տարածքից։
«Եվրախորհրդարանի պատգամավորները խստորեն դատապարտում են 2022 թվականի սեպտեմբերին հարևան Ադրբեջանի կողմից Հայաստանի վրա իրականացված լայնածավալ ռազմական հարձակումը, որը խաթարեց խաղաղության հասնելու նախկին փորձերը և հանգեցրեց ադրբեջանական ուժերի կողմից Հայաստանի ինքնիշխան տարածքի օկուպացմանը»,- ասված է զեկույցում։
Ընդգծելով, որ այս վերջին ագրեսիան ուղղակիորեն կապ չունի Լեռնային Ղարաբաղի տարածաշրջանում երկարաժամկետ հակամարտության հետ, զեկույցը կոչ է անում Ադրբեջանի իշխանություններին դուրս բերել զորքերը Հայաստանի տարածքի բոլոր հատվածներից։ Նա նաև կոչ է անում երկու երկրների կառավարություններին աշխատել համապարփակ և փոխընդունելի խաղաղության պայմանագրի ուղղությամբ, իսկ ԵՄ-ին հորդորում է շարունակաբար ներգրավվել, միջնորդել և արդյունավետորեն նպաստել այս հակամարտության խաղաղ լուծմանը:
Այնուամենայնիվ, Եվրախորհրդարանի պատգամավորները վերահաստատում են, որ ցանկացած նման խաղաղ պայմանագիր արդյունավետ լինելու համար պետք է ներառվի դրույթներ, որոնք երաշխավորում են Հայաստանի ինքնիշխան տարածքի ամբողջականությունը, Լեռնային Ղարաբաղում և հակամարտությունից տուժած այլ տարածքներում ապրող հայ բնակչության իրավունքներն ու անվտանգությունը, ինչպես նաև փախստականների և ներքին տեղահանվածների արագ և անվտանգ վերադարձն իրենց տներ:
«Զեկույցը ողջունում է 2021 թվականի մարտին Հայաստան-ԵՄ Համապարփակ և ընդլայնված գործընկերության համաձայնագրի ամբողջական ուժի մեջ մտնելն ու այն իրականացնելու Հայաստանի հանձնառությունը։ Եվրախորհրդարանի պատգամավորները նաև գովաբանում են Հայաստանին՝ վերջին տարիներին իրականացրած նշանակալի բարեփոխումների, ժողովրդավարացման գործընթացի համար, որոնց արդյունքում երկիրը դարձել է տարածաշրջանում ժողովրդավարության առաջատար»,- նշված է զեկույցում:
ԵԽ պատգամավորները նաև կոչ են անում ԵՄ-ին և Հայաստանին սերտորեն աշխատել Համապարփակ և ընդլայնված գործընկերության համաձայնագրի շրջանակներում ընթացիկ և ապագա բարեփոխումների իրականացման վրա՝ միաժամանակ ընդգծելով, որ այն ընդգրկում է համատեղ աշխատանքի լայն շրջանակ՝ ներառյալ ժողովրդավարության, օրենքի գերակայության և մարդու իրավունքների ամրապնդումը, տնտեսական աճը և ոլորտային համագործակցության խթանումը:
Բացի այդ, զեկույցն ընդունում է Հայաստանի պայքարը հանցավորության և կոռուպցիայի դեմ և կոչ է անում կառավարությանը շարունակել բարեփոխումների իրականացումը ժողովրդավարական ինստիտուտների, օրենքի գերակայության և դատական համակարգի անկախության ամրապնդման համար՝ չնայած միջազգային բարդ իրավիճակին և մարտահրավերներին, որոնց բախվում է Հայաստանը:
Նշվում է, որ Եվրախորհրդարանի պատգամավորները մտահոգված են Հայաստանում ռուսական ապատեղեկատվական արշավներով։ Ողջունելով լրատվամիջոցների ազատության բարելավումները՝ Եվրախորհրդարանի պատգամավորները շեշտում են, որ երկրի մեդիա միջավայրը շարունակում է բնութագրվել բևեռացվածությամբ և մտահոգված են լրագրողների նկատմամբ ատելության խոսքի և ֆիզիկական բռնության դեպքերով։
Եվրախորհրդարանի պատգամավորները նաև մտահոգված են Հայաստանում շարունակվող ռուսական ապատեղեկատվական արշավներով, որոնք ուղղված են Եվրամիությանն ու Արևմուտքին, և կոչ են անում ջանքեր գործադրել՝ կրթելու և բարելավելու երկրի մեդիա ոլորտի բազմազանությունը և խթանելու մեդիա գրագիտությունը: Ամբողջությամբ աջակցելով ապատեղեկատվության դեմ պայքարում Հայաստանի կառավարության ջանքերին՝ Եվրախորհրդարանի պատգամավորներն ասում են, որ ցանկացած միջոց չպետք է հանգեցնի լրագրողների կամ խոսքի ազատության սահմանափակումների։
«ԵՄ-Հայաստան հարաբերությունների մասին զեկույցը ևս մեկ անգամ վերահաստատում է տարածաշրջանում խաղաղության ուղղությամբ Եվրոպական խորհրդարանի հանձնառությունը և մի շարք կարևոր ոլորտներում Հայաստանի ու ԵՄ-ի համագործակցությանը։ Որպես այս ուղղությամբ կարևոր քայլ՝ մենք ողջունում ենք Հայաստանում ԵՄ առաքելության ստեղծումը և կոչ ենք անում Ադրբեջանի կառավարությանը երաշխավորել տեղաշարժի ազատությունն ու անվտանգությունը Լաչինի միջանցքով, որը գրեթե երկու ամիս արգելափակված է»,- ասել է խոսնակ Անդրեյ Կովաչևը։
Նշվում է, որ զեկույցն ընդունվել է 55 կողմ, 5 ձեռնպահ ձայներով: Հանձնաժողովի քվեարկությունից հետո տեքստն ամբողջությամբ կներկայացվի Եվրախորհրդարանի հաստատմանը:
