Երեքշաբթի օրը Եվրախորհրդարանը ճնշող մեծամասնությամբ հավանություն է տվել բանաձեւին, որում կոչ է արվում Ուկրաինային ԵՄ-ի թեկնածու երկրի կարգավիճակ տրամադրել։ Դրանում նշվում է, որ պետք է պահպանվեն անհրաժեշտ ընթացակարգերը։
Ուկրաինայի իշխանությունները նախօրեին դիմել էին ԵՄ-ը արագացված ընթացակարգով միությանը միանալու համար: Բանաձևը նաև դատապարտում է Ռուսաստանի զինված ներխուժումն Ուկրաինա և Բելառուսի առաջնորդ Ալեքսանդր Լուկաշենկոյի դերն ագրեսիայում, կոչ է արվում մարդասիրական օգնություն ցուցաբերել Ուկրաինային և հոգ տանել փախստականների մասին։
Բանաձևը կոչ է անում սահմանափակել Ռուսաստանից նավթի և գազի արտահանումը, արգելել ԵՄ նոր ներդրումները Ռուսաստանում և հակառակը, ամբողջությամբ կտրել Ռուսաստանին SWIFT համակարգից։ Հավանություն է տրվել նաեւ Ռուսաստանում և Բելառուսում «բարձրաստիճան կոռումպացված պաշտոնյաների» դեմ պատժամիջոցներին։
Բանաձեւին կողմ է քվեարկել 637 պատգամավոր, դեմ է եղել միայն 13-ը։
