«Հայաստանը որևէ տարածքային պահանջ չունի ոչ մի հարևանից, այդ թվում՝ Ադրբեջանից». լրագրողների հետ ճեպազրույցում ասել է ԱԺ փոխխոսնակ Հակոբ Արշակյանը՝ բացատրելով, որ իր ասածը նշանակում է, որ անհրաժեշտություն կա ճշգրտել պետական սահմանները և այն տարածքները, որոնք Հայաստանին ու Ադրբեջանին են պատկանում։
Նրա խոսքով՝ խաղաղության պայմանագրի տրամաբանությունը մոտեցումների մասին է, ոչ թե նրա, որ պայմանագիրը սեղանին է և պիտի ստորագրվի․ «Խնդիրը սկզբունքների ճշգրտման մեջ է։ Թվերի մասին խոսելիս խոսում են կոնկրետության մասին»։
Արշակյանի դիտարկմամբ՝ այս համատեքստում Արցախի հարցը այս մոտեցումների մեջ ընկալվում է այնպես, որ արցախահայության իրավունքների և անվտանգության հարցերի շուրջ պետք է ստեղծվի միջազգային ֆորմատ, և երկխոսության մեջ պետք է մտնեն Ստեփանակերտն ու Բաքուն։ ԱԺ փոխնախագահի կարծիքով՝ երբ Արցախը խոսում է իր իրավունքների մասին, նշանակում է՝ ներկա է այդ սեղանի շուրջ, և փոխվել է այն տրամաբանությունը, երբ Արցախը բացակա էր բանակցությունների սեղանից։ «Այն պահից, երբ նախագահ Ռոբերտ Քոչարյանը, որպես Հայաստանի նախագահ, սկսեց բանակցել ոչ միայն Հայաստանի, այլև Արցախի անունից, անուղղակի պարզվեց, որ Հայաստանը տարածքային վեճ ունի Ադրբեջանի հետ։ Մենք ասում ենք, որ տարածքային վեճ չունենք Ադրբեջանի հետ։ Այսինքն, փոխադարձաբար ճանաչում ենք միմյանց տարածքային ամբողջականությունը, և դրանից հետո ստեղծվում են միջազգային մեխանիզմներ, որոնք պատասխանատու են Արցախի և Ադրբեջանի երկխոսության և արցախահայերի իրավունքների և անվտանգության երաշխիքների համակարգման համար»։
