Հայաստանը 4 կետով նահանջել է «Ինտերնետի ազատության» զեկույցում՝ 100-ից 71 միավոր ստանալով։ Այդ մասին նշված է Freedom House իրավապաշտպան կազմակերպության «Ինտերնետի ազատությունը» զեկույցում։
Հայաստանը դասվել է ազատ ինտերնետով երկրների թվին։ Ըստ զեկույցի, այդ ցուցանիշը պայմանավորված է տարբեր կայքերի և դոմենների արգելափակմամբ՝ 44-օրյա պատերազմի ժամանակ հայկական ռեսուրսների վրա հաքերային գրոհի ժամանակ, ինչպես նաև հակամարտության լուսաբանման դժվարություններով, որոնք առաջացել էին ռազմական դրության և կորոնավիրուսի պատճառով։
Զեմույցում ասվում է, որ մի շարք թուրքական և ադրբեջանական կայքեր .az և .tr դոմեններով անհասանելի են եղել մի քանի շաբաթ շարունակ։ Օգտատերերը նաև հայտնել են TikTok-ի հասանելիության հետ կապված խնդիրների մասին։ Հայտնի լրատվական կայքերը նույնպես ենթարկվել են տեխնիկական գրոհների, այդ թվում DdoS հարձակումների, որի հետևանքով դրանցից շատերը տևական ժամանակ անհասանելի են եղել պատերազմի ժամանակ։
Զեկույցում որպես դրական կողմ նշվել է, որ ՀՀ կառավարությունը դադարեցրել է հեռախոսազանգերի տեղորոշման և ձայնագրության մասին տվյալների հավաքագրումը հեռահաղորդակցության ընկերություններից, իսկ սարքերը, որտեղ պահվում էր տեղեկատվությունը, ֆիզիկապես ոչնչացվել են։
Հեղինակավոր իրավապաշտպան կազմակերպության զեկույցում անազատ ինտերնետով երկրների ցանկին են դասվել Ադրբեջանը, Իրանը և Թուրքիան։
Freedom House իրավապաշտպան կազմակերպության հրապարակած «Ինտերնետի ազատություն 2021» զեկույցում հիմք են ընդունվել նաև Հայաստանի մարդու իրավունքների պաշտպան Արման Թաթոյանի հայտարարությունները։
Զեկույցի հղումը՝ https://bit.ly/3zDVqwa