Ա. Շավարշյանի անվան թիվ 40 դպրոցում ներկայացվեց «Հայկական Քաշաթաղ»-ը խորագիրը կրող լուսանկարների ցուցահանդեսը։
Լուսանկարներն ընդգրկում են Քաշաթաղ շրջվարչակազմի «Մերան» պաշտոնաթերթի գլխավոր խմբագիր, լրագրող, լուսանկարիչ, արցախյան ազատամարտիկ Զոհրաբ Ըռքոյանի լուսանկարները, որոնցում պատկերված են Քաշաթաղի հուշարձանային ժառանգությունը, ինքնատիպ խաչքարերը, ու հայրենի հարուստ բնաշխարհը։ Իր լուսանկարչական գործունեությունը Զոհրաբ Ըռքոյանը սկսել է դեռ երիտասարդ տարիներին, երբ 1994թ-ին մասնակցեց ՀՀ և Արցախի սահմանների պաշտպանական և ազատագրական մարտերին։
«Պատմական Հայաստանի, Սյունիքի, Արցախ աշխարհի պատմական հուշարձաններն են, որոնք, երբ 1993թ-ին ազատագրվեցին, կազմավորվեց Արցախի յոթերորդ՝Քաշաթաղի շրջանը, և կազմավորման ընթացքում հայտնաբերեցինք այս հնագույն հուշարձաններն ու խաչքարերը,-ասաց լուսանկարիչ Զոհրաբ Ըռքոյանը։
Նա պատմեց, որ վերջին անգամ Քաշաթաղի բնությունը լուսանկարել է 2020 թվականի սեպտեմբերի 26-ին, պատերազմը սկսվելուց առաջ։
«Ծիծեռնավանքում պատարագ տեղի ունեցավ, հենց այդ ժամանակ էլ եղավ վերջին լուսանկարս Արցախ աշխարհում,-նշեց Պարոն Ըռքոյանը։ Նա հույս հայտնեց, որ մի օր ազատագրված Հայրենիքում նորից լուսանկարներ կունենա հայրենի գյուղից՝ Քաշաթաղից։
«Սա մեր Հայրենիքն է, մեր հողը, պիտի ամեն կերպ փորձենք շենացնել և դրա մասնակիցը պիտի լինեն բոլոր հայերը, որովհետև հավաքական միասնությունը միշտ կհաղթի,-նշեց Զոհրաբ Ըռքոյանը։
Ցուցահանդեսը բաց կլինի մինչև 2023 թվականի փետրվարի 25-ը, այն կազմակերպել են Հ. Թումանյանի անվան թանգարանն ու Ա. Շավարշյանի անվան թիվ 40 դպրոցը։
Հեղինակ՝ Սեդրակյան Անժելա
