Ուկրաինայի հյուսիսում, արևելքում և հարավ-արևելքում մարտերը շարունակվում են։ Ռուսական զորքերը շրջափակել են մի քանի խոշոր քաղաքներ, այդ թվում՝ Մարիուպոլն ու Չեռնիգովը, սակայն չեն կարողանում գրավել դրանք։ Այս մասին հաղորդում է «Ազատություն» ռադիոկայանի ռուսական ծառայությունը: Ուկրաինայի ուղղափառ եկեղեցին հայտնել է, որ գնդակոծության ժամանակ վնասվել են Դոնեցկի մարզում գտնվող Սվյատոգորսկի Լավրայի շենքերը։
Ռուսաստանի կողմից օկուպացված Խերսոնը դադարեցրել է ուկրաինական հեռուստաալիքների հեռարձակումը, ռուս զինվորականները և Ազգային գվարդիան փնտրում և ձերբակալում են ուկրաինամետ ակտիվիստներին, Ուկրաինայի արտգործնախարարը հայտնել է, որ Ռուսաստանը նախատեսում է տարածաշրջանում «հանրաքվե» անցկացնել:
Կիրակի օրը Ռուսաստանի տարբեր քաղաքներում անցկացված հակապատերազմական ակցիաների արդյունքում հարյուրավոր ձերբակալվածներ շարունակում են մնալ ոստիկանական բաժանմունքներում։ Ռոսկոմնադզորը երկուշաբթի սկսել է արգելափակել Instagram-ը։
Միավորվելու և սեփական ժողովրդին միշտ հիշելու ունակության շնորհիվ Ուկրաինան հաղթելու է Ռուսաստանին, այս մասին հայտարարել է Ուկրաինայի նախագահ Վլադիմիր Զելենսկին։
«Այսօր Ուկրաինայի անկախության համար պատերազմի 18-րդ օրն է, այսօրվա սկիզբը սև էր, ռուսական հրթիռներն ու ռումբերը նորից հարվածել են մեր պետությանը», – ասել է Զելենսկին իր տեսաուղերձում։
«Եթե դուք չփակեք մեր երկինքը, ապա ռուսական հրթիռները կհայտնվեն ձեր տարածքում, ՆԱՏՕ-ի տարածքում, ՆԱՏՕ-ի երկրների քաղաքացիների տների վրա, դա միայն ժամանակի հարց է», – դիմելով արևմտյան երկրների առաջնորդներին նշել է Զելենսկին:
Ուկրաինայի նախագահը խոսել է նաև Ռուսաստանի հետ բանակցությունների մասին՝ նշելով, որ Ուկրաինայի և Ռուսաստանի Դաշնության ներկայացուցիչները ամեն օր շփվում են տեսաֆորմատով։
«Մեր պատվիրակության առջև հստակ խնդիր կա՝ անել ամեն ինչ, որպեսզի նախագահների հանդիպումը կայանա։ Հանդիպում, որին, վստահ եմ, մարդիկ անհամբեր սպասում են: Ակնհայտ է, որ սա բարդ պատմություն է։ Բարդ ճանապարհ… Մեր նպատակն է, որ Ուկրաինան անհրաժեշտ արդյունք ստանա այս բարդ բանակցային աշխատանքում», – ասել է Զելենսկին։
Ռուսաստանի օդատիեզերական ուժերի Սու-25 գրոհային օդանավերը հրթիռային հարված են հասցրել Ուկրաինայի զինված ուժերի զինամթերքի պահեստին։ Օդային հարվածը հասցվել է հրթիռային զինատեսակներով երկու հարվածային Սու-25 օդանավերի միջոցով: Թիրախում եղել է Ուկրաինայի Զինված ուժերի զինամթերքի պահեստը, որը ոչնչացվել է: Այս մասին հայտնել է ՌԴ պաշտպանական գերատեսչությունը:
ՆԱՏՕ-ի մուտքը Ուկրաինական հակամարտություն կարող է վերածվել երրորդ համաշխարհային պատերազմի, կարծում է Եվրոպական խորհրդի նախագահ Շառլ Միշելը։ Մենք անում ենք ամեն ինչ, որպեսզի չսրենք հակամարտությունը», -նշել է Միշելը:
Շառլ Միշելը նաեւ հիշեցրել է, որ Ռուսաստանը միջուկային տերություն է, և Երվրոպայում լավ գիտեն, որ եթե այս հակամարտությունը վերածվի ՆԱՏՕ-ի և Ռուսաստանի միջև հակամարտության, ապա սկիզբ կդրվի երրորդ համաշխարհային պատերազմի:
ԱՄՆ պետքարտուղար Էնթոնի Բլինկենը հեռախոսազրույց է ունեցել Ուկրաինայի արտգործնախարար Դմիտրի Կուլեբայի հետ՝ քննարկվել է հակամարտությունը դադարեցնելու դիվանագիտական ջանքերը։ Այս մասին հայտնել է ԱՄՆ Պետքարտուղարությունը:
Իսկ Ֆրանսիայի նախագահ Էմանուել Մակրոնը մարտի 13-ի երեկոյան հեռախոսազրույց է ունեցել իր ամերիկացի պաշտոնակից Ջո Բայդենի հետ: Ինչպես տեղեկացրել է Ելիսեյան պալատի մամուլի ծառայությունը, երկու պետությունների ղեկավարները համաձայնության են եկել Ռուսաստանի դեմ սահմանափակումների խստացման շուրջ: