Երեկ ուշ երեկոյան ԱՄՆ պետքարտուղարության պաշտոնական ներկայացուցիչ Նեդ Փրայսը, պատասխանելով հայ-ադրբեջանական սահմանային սրացմանը վերաբերող հարցերին ու խաղաղության հաստատման գործում ԱՄՆ դերակատարությանը, հայտարարել է. «Ինչ վերաբերում է Հայաստանին և Ադրբեջանին, մենք ողջունում ենք շարունակական հավատարմությունը հրադադարին: Մենք շարունակում ենք կողմերին կոչ անել՝ ներգրավվել խաղաղ գործընթացում։ Մենք կոչ ենք անում՝ պահպանել ռազմական գործողությունների դադարեցումը, դուրս բերել ռազմական ուժերը և աշխատել առկա բոլոր չլուծված խնդիրները լուծել խաղաղ բանակցությունների միջոցով։ Ուժի կիրառումը երբեք ընդունելի ճանապարհ չէ, և մենք ուրախ ենք, որ Հայաստանում և Ադրբեջանում բարձր մակարդակներով շարունակվող ներգրավվածությունը կողմերին օգնել է՝ հասնել հրադադարի։ Մենք շարունակում ենք ներգրավվել և խրախուսել աշխատանքը, որն անհրաժեշտ է կայուն խաղաղության հասնելու համար: Սրան ռազմական լուծում չի կարող լինել։
Մեր ավագ խորհրդական դեսպան Ռիկերը եղել է տարածաշրջանում: Նա այժմ Վիեննայում է՝ հանդիպելու ԵԱՀԿ-ի գործընկերների հետ: Պետքարտուղարի օգնական Դոնֆրիդը կապի մեջ է եղել տարածաշրջանում իր գործընկերների հետ: Դեսպան Ռիկերը զրուցել է նախագահ Ալիևի հետ։ Պետքարտուղարն, իհարկե, մի քանի օր առաջ հնարավորություն է ունեցել խոսել երկու առաջնորդների հետ: Ես ակնկալում եմ, որ նա հնարավորություն կունենա նորից խոսել ղեկավարների հետ։ Նա անձամբ է կենտրոնացել դրա վրա և շարունակելու է ներգրավված լինել»:
