Հանրային հեռուստաընկերության եթերում ԱԽ քարտուղար Արմեն Գրիգորյանը հայտնել է, որ ադրբեջանական կողմը հայկական կողմին տեղեկացրել է, որ այսօրվանից՝ գիշերը 12-ից սկսած՝ Գորիս-Կապան ճանապարհի հատվածում կիրականացնի սահմանային և մաքսային հսկողության գործառույթ, այսինքն՝ մաքսակետեր կտեղադրի։
Արմեն Գրիգորյանը տեղեկացրեց, որ հայկական կողմը ևս համապատասխան քայլեր կձեռնարկի։
«Հայաստանը՝ ճանապարհի այդ հատվածում ևս կտեղադրի մաքսային և սահմանային գործառույթներ իրականացնող կետեր և այդ աշխատանքները նախապես արդեն սկսել ենք», – ասաց Գրիգորյանը։
Գրիգորյանը նաեւ անդրադարձել է՝ Կապան-Տաթև այլընտրանքային ճանապարհին։
«Ինչպես հայտարարվել է արդեն, պատրաստ է Կապան-Տաթև ճանապարհը, այնտեղից էլ կամ Գորիս կամ Երևան՝ կարելի է ասել անվտանգ շահագործվող ճանապարհ ունենք, այլընտրանքային ճանապարհն արդեն պատրաստ է՝ ինչպես ապրանքներ տեղափոխելու, այնպես էլ այլ տեսակի ցանկացած ավտոմեքենայի համար ճանապարհն օգտագործելի է։ Շատ կարևոր է, որ նոր կառուցված ճանապարհ է», – ասաց Գրիգորյանը