Ազգային ժողովն արտահերթ նիստում քննարկում է «Ապօրինի ծագում ունեցող գույքի բռնագանձման մասին օրենքում փոփոխություններ և լրացումներ կատարելու մասին» օրենքի նախագիծը։
Օրենքի նախագիծը ներկայացրեց ՀՀ գլխավոր դատախազի տեղակալ Սրբուհի Գալյանը
«Առաջարկվող փոփոխությունները և լրացումները, անշուշտ, կնպաստեն ոչ վաղ անցյալում մեր պետությունում ներդրված այս կարևորագույն ինստիտուտի կիրառման արդյունավետության բարձրացմանը։ Նախագծով առաջարկվում է օրենքի իմաստով պաշտոնատար անձ հասկացությունն ընդլայնել և դրանում բացի հանրային պաշտոն զբաղեցնող անձանցից ներառել նաև Հանրային ծառայության մասին օրենքի իմաստով հայտարարագիր ներկայացնելու պարտականություն ունեցող անձանց։ Առաջարկվում է նաև վարույթ իրականացնող մարմնի համար նախատեսել լիազորություն, որպեսզի իրավասու մարմինը հնարավորություն ունենա փոքրաթիվ դեպքերում սեփական նախաձեռնությամբ սկսել ուսումնասիրության վարույթ, իհարկե, որոշակի խումբ անձանց նկատմամբ։ Խոսքը կրկին պաշտոնատար անձանց մասին է, և պաշտոնատար անձ ասելով՝ օրենքի իմաստով պետք է հասկանալ միայն Հանրային ծառայության մասին օրենքի իմաստով հայտարարագիր ներկայացնելու պարտականություն ունեցող անձանց»,-ասաց Գալյանը:
Նախագծով առաջարկվում է հիմքում ունենալով Քաղաքացիական օրենսգրքի ընդհանուր հայցային վաղեմության ժամկետը՝ ուսումնասիրության ժամկետ նախատեսել 3 տարին՝ 2 տարվա փոխարեն։ «Առաջարկվում է կատարել ևս մեկ բովանդակային փոփոխություն, ըստ որի՝ վարույթ իրականացվող մարմնին պետք է հնարավորություն ընձեռվի որևէ գույքի շուկայական արժեքի չափով գումար պահանջելու փոխարեն պահանջել ձեռք բերման արժեքի չափով գումար։
«Խոսքը միայն այն դեպքերի մասին է, երբ այդ շուկայական արժեքի պարզումը կլինի անհնար։ Նախատեսվում է նաև, որ գույքի՝ արտասահմանում գտնվելու պատճառով, երբ իրավասու մարմինը զրկված կլինի հնարավորությունից՝ պարզելու շուկայական արժեքը, կարողանա անձինց պահանջել ոչ թե այդ գույքը կամ դրա շուկայական արժեքը, այլ ձեռքբերման արժեքը, այսինքն՝ պայմանագրային արժեքը, եթե այդպիսին հայտնի է»,- նշեց գլխավոր դատախազի տեղակալը: