Կառավարության որոշմամբ սահմանվեցին պայմանագրային զինծառայողների ատեստավորման արդյունքների գնահատման նոր ձևաչափը, ստացած գնահատականների հիման վրա հավելավճարների նոր չափերը, ինչպես նաև հստակեցվեց օրենքով սահմանված դեպքերում իրականացված նոր ատեստավորման արդյունքներով զինծառայողին համապատասխան չափով հավելավճարի հաշվարկման կարգը:
ՀՀ վարչապետ Նիկոլ Փաշինյանն, արձագանքելով այս որոշմանը, նշեց. «ԶՈւ-ում ատեստավորման արդյունքում աշխատավարձերը պետք է առնվազն կրկնապատկվեն։ Սահմանել ենք ատեստավորման չափանիշ, որը գերազանցողի աշխատավարձը կկրկնապատկվի։ Վերջին ամիսներին տեղի են ունենում ատեստավորման գործընթացի նախապատրաստությունները»։
Փաշինյանի խոսքով՝ սպայական կազմի համար գերազանց ստանալու դեպքում աշխատավարձը կավելանա․ «Եթե առանց հարկերի ստանում են 350 հազար դրամ, ատեստավորումից հետո կստանան 700 հազար դրամ; եթե ստանում են 400 հազար դրամ, կստանան 800 հազար դրամ։ Հիմա ավելացնում ենք ևս երկու կետ՝ «լավ»-ի դեպքում աշխատավարձը կբարձրանա 420 հազար դրամով, «բավարար»-ի դեպքում՝ 230 հազար դրամով․ կխնդրեմ նկատի ունենալ՝ հարկերը ներառյալ»։
Սուրեն Պապիկյանն էլ նշեց, թե շարքային կազմը (մարտական հերթապահությունը՝ ներառյալ) «բավարար» գնահատականի դեպքում կստանա 321.910 դրամ, «լավ» գնահատականի դեպքում՝ 430.910 դրամ, գերազանցի դեպքում՝ 470.910 դրամ. «Օրինակ, գնդապետը «բավարար» գնահատականի դեպքում մարտական հերթապահություն իրականացնող զորամասում կստանա 737.760 դրամ, գերազանցի դեպքում՝ 923.260 դրամ»։
Ըստ Նիկոլ Փաշինյանի՝ մարդիկ պատրաստվում են ատեստավորման, ինչի արդյունքում մարտական պատրաստության ավելի ինտենսիվ գործընթաց է տեղի ունենում, նաև՝ դրանով մեծանում է պայմանագրային զինծառայության գրավչությունը։
