Ադրբեջանի արտաքին գործերի նախարար Ջեյհուն Բայրամովը երկուշաբթի օրը հանդիպել է ԱՄՆ Պետդեպարտամենտի՝ Կովկասում բանակցությունների գծով ավագ խորհրդական, ԵԱՀԿ ՄԽ ամերիկացի համանախագահ Ֆիլիպ Ռիկերի հետ, որի ընթացքում կողմերը քննարկել են հայ-ադրբեջանական հարաբերությունների կարգավորման գործընթացը։
Ադրբեջանի ԱԳՆ-ի հրապարակած տեղեկատվության մեջ նշվում է, որ կողմերը քննարկել են Բաքվի և Երևանի միջև խաղաղության պայմանագրի տարրերը և դրանից բխող հարցերը, տարածաշրջանում հաղորդակցությունների բացումը և հայ-ադրբեջանական սահմանի սահմանազատման գործընթացը։
Ռիքերը վերահաստատել է ԱՄՆ-ի պատրաստակամությունը՝ ամեն կերպ նպաստելու հայ-ադրբեջանական հարաբերությունների կարգավորմանը։ Նա նաև ընդգծել է խաղաղության պայմանագրի տարրերի շուրջ շարունակվող բանակցությունների կարևորությունը։
«Կողմերը քննարկել են նաև երկկողմ օրակարգի տարբեր ասպեկտներ և փոխադարձ հետաքրքրություն ներկայացնող այլ հարցեր»,- ընդգծում է Ադրբեջանի ԱԳՆ-ն։