ՀՀ Տարածքային կառավարման և ենթակառուցվածքների նախարար Գնել Սանոսյանը Հայաստանի Հանրապետությունում Իտալիայի արտակարգ և լիազոր դեսպան Ալֆոնսո Դի Ռիզոյի հրավերով այցելել է Ժամանակակից արվեստի թանգարան և դեսպանի ուղեկցությամբ դիտել Պատրիցիա Պոզիլիպոյի «Հետքեր» խորագրով ցուցահանդեսը։
«Հետքեր»-ը արվեստագետի արևմուտքից՝ արևելք, հյուսիսից՝ հարավ Իտալիայի և Հայաստանի միջև կատարած ճամփորդության նկարներով պատում է, որով փորձ է արվել գտնել դարեր շարունակ երկխոսության մեջ գտնվող երկու ժողովուրդների միջև կենդանի մշակութային հարաբերություններ և տարբերություններ։
Դեսպանն ընդգծել է, որ այս ցուցահանդեսը վկայում է հայ-իտալական հարաբերությունների խորության մասին․«Կա երեք տեսակի դիվանագիտություն՝ կառավարությունների միջև դիվանագիտություն, խորհրդարանական դիվանագիտություն և կա ժողովուրդների դիվանագիտություն, որն իրականացվում է ճամպրուկներով մարդկանց տեղափոխությունների շնորհիվ։ Անկախ այն պատճառներից, թե ինչու են մարդիկ մի վայրից տեղափոխվում այլ վայր բնակվելու, նրանք ժամանակի, պատմության ընթացքում միշտ թողնում են հետքեր։ Այդ հետքերից ծնվում են բույսեր, որոնք հետո վերածվում են մեծ ծառերի և տալիս պտուղներ»,-ասել է դեսպանը։
Նախարարը շնորհակալություն է հայտնել դեսպանին ցուցադրության համար և ողջունել միտքը, որով փորձ է արվել Իտալիայում գտնել հայկական հետքեր, իսկ Հայաստանում՝ իտալական։ Նախարարը նկատել է, որ եթե այդ ուղղությամբ փնտրտուքները շարունակվեն, ապա այդ կապի վերաբերյալ շատ այլ փաստեր ի հայտ կգան։
‼Նախարարը ևս ընդգծել է, որ ժողովուրդների միջև կապը շատ արժեքավոր է։
ℹՊատրիցիա Պոզիլիպոյի «Հետքեր» խորագրով ցուցահանդեսը բաց է մինչև փետրվարի 20-ը։