Այսօրվա դրությամբ դիահերձարաններում դեռ կան 44-օրյա պատերազմում զոհված զինծառայողների մասունքներ, որոնք նույնականացվել են, սակայն ծնողները չեն հուղարկավորում։ Այս մասին այսօր լրագրողներին հայտնել է առողւապահության նախարար Անահիտ Ավանեսյանը:
«Այո, ցավոք սրտի, դեռ ունենք նման դեպքեր, երբ նույնականացումն ավարտվել է, անգամ մի քանի, կրկնվող հետազոտությունների պարագայում էլ ծնողները կամ հարազատները դեռ իրենց մեջ ուժ չեն գտնում տանելու և հուղարկավորելու։ Մենք պատկերացնում, հասկանում ենք, որ դա ցավոտ, շատ դժվար պրոցես է։ Ե՛վ ՔԿ-ն, և՛ մյուս պատկան մարմինները զբաղվում են, որպեսզի այս ընթացքը հնարավորինս արագ ավարտին բերենք», – ասաց Ավանեսյանը։
Անահիտ Ավանեսյանի խոսքով մարմինների, մասունքների ԴՆԹ հետազոտման, նույնականացման գործընթացն ամբողջութամբ ավարտվել է։
«Մենք ունեինք դժվար հետազոտվող մասունքներ, որոնք շատ քայքայված էին, շատ դժվար էր դրանցից ԴՆԹ առանձնացնելը: Մենք 100-ից մի փոքր ավելի մասունք ուղարկեցինք Հոլանդիա, ստացանք դրանց արդյունքները, և այդ փուլը ևս ավարտվել է։ Այս պահին, կարելի է ասել, որ մենք նույնականացման գործընթացն ամբողջովին ավարտել ենք, ներկայում հետազոտման մեջ չունենք որևէ փորձանմուշ»,- նշեց Անահիտ Ավանեսյանը։
