Պատմությունը սիրում է կրկնվել, եթե դրանից դասեր չեն քաղում։ Իսկ Հայաստանում պատմությունից դասեր կամ չեն կարողանում քաղել, կամ չեն ցանկանում։
Երեկ հայտնի դարձավ, որ Արցախում ադրբեջանական զորքը խախտել է շփման գիծը եւ մտել է Փառուխ գյուղ։ Ասկերանի շրջանի Փառուխ գյուղը գտնվել է ռուս խաղաղապահների պատասխանատվության գոտում։ Երեկ տարբեր աղբյուրներից հայտնի դարձավ նաեւ, որ ռուս խաղաղապահները խնդրել են հայկական կողմին չկրակել ադրբեջանցիների ուղղությամբ եւ իրենք կփորձեն հարցը կարգավորել։
Թե ինչպես են ռուսները հարցեր կարգավորում հայերի համար՝ թերեւս բոլորին է հայտնի։ Ռուսները երբեք հայերի օգտին հարցեր չեն կարգավորել։ Հակառակը հայերի հաշվին իրենց հարցերն են կարգավորել Ադրբեջանի եւ Թուրքիայի հետ։ Դրա վառ ապացույցներից մեկը 1991 թվականին Արցախի հայաբնակ գյուղերի բռնի հայաթափումն էր՝ խորհրդային (ռուսական) զինուժի և ադրբեջանական ՕՄՕՆ-ի կողմից։
Փառուխում պատմությունը կրկնվում է, սակայն մեկ տարբերությամբ՝ գյուղերը հայաթափում են առանց ուժի կիրառմամբ։ Հավանաբար ռուսները գործի են դրել՝ «գույք պարտքի դիմաց», իրենց հայտնի քայլը, այս անգամ՝ գազ գյուղի դիմաց տարբերակով։
