Բելառուսի նախագահ Ալեքսանդր Լուկաշենկոն ծննդյան օրվա առթիվ շնորհավորել է Հայաստանի վարչապետ Նիկոլ Փաշինյանին։ Այդ մասին հայտնել է Լուկաշենկոյի մամլո ծառայությունը։
«Համոզված եմ, որ Դուք՝ Ձեր հարուստ կառավարչական փորձով, պետական խնդիրների լուծման մասնագիտական մոտեցմամբ, կշարունակեք հաջողությամբ հաղթահարել Հայաստանի առջև ծառացած մարտահրավերները քաղաքական և սոցիալ-տնտեսական ոլորտներում և կհասնեք հայ ժողովրդի շահերից բխող բոլոր նպատակներին», – ասվում է շնորհավորական ուղերձում։
Լուկաշենկոն հույս է հայտնել, որ կառուցողական երկխոսությունը կշարունակվի՝ ուղղված բելառուսա-հայկական համապարփակ գործընկերության զարգացմանը, ինտեգրացիոն ասոցիացիաներում սերտ համագործակցությանը, միջազգային հարթակներում ռազմավարական համագործակցությանը։ Ալեքսանդր Լուկաշենկոն Նիկոլ Փաշինյանին մաղթել է նորանոր հաջողություններ պատասխանատու աշխատանքում, քաջառողջություն, երջանկություն, խաղաղություն և ներդաշնակություն։
