ԱԺ «Հայաստան» խմբակցությունը չի մասնակցի կառավարության հետ այսօրվա հարցուպատասխանին։
Ընդդիմադիր խմբակցությունը չի մասնակցում նա ԱԺ այս պահին ընթացող նիստին. սա այն բանից հետո, երբ ԱԺ դահլիճում միջադեպ տեղի ունեցավ ՔՊ և «Հայաստան» խմբակցությունների պատգամավորների միջև։ Ընդմիջումից հետո ընդդիմադիրները չվերադարձան դահլիճ։
Հիշեցնենք, որ քիչ առաջ վեճ տեղի ունեցավ ԱԺ դահլիճում՝ «Հայաստան» խմբակցության պատգամավոր Արթուր Սարգսյանի ելույթի ժամանակ։ ԱԺ դահլիճում տեղի ունեցած վեճը տեղափոխվել էր միջանցք։ Այս անգամ վիճաբանություն է տեղի ունեցել «Հայաստան» խմբակցության պատգամավորների ու անվտանգության աշխատակիցների միջև։
Պատգամավոր Արթուր Սարգսյանը, դիմելով իրեն դահլիճից հանած անվտանգության աշխատակիցներին, բղավել է, թե իրեն դուրս հանելու ի՞նչ իրավունք ունեն, ասել, որ մայորն իր արարքների համար պատասխան պետք է տա, ինչո՞ւ նույնկերպ չեն վարվել նաև Հովիկ Աղազարյանի հետ, որի ռեպլիկից հետո վիճաբանությունը եղավ։
Այնուհետև ԱԺ «Հայաստան» խմբակցության պատգամավորների ու անվտանգության աշխատակիցների միջև քաշքշուք է սկսվել։
