ԱԺ ՔՊ խմբակցության ղեկավար Հայկ Կոնջորյանը հայտարարել է, թե հանձինս Անահիտ Մանասյանի իրենք ճիշտ թեկնածու են առաջադրել ՄԻՊ պաշտոնում։ Նա անդրադարձել է հարցադրումներին, թե ինչպես կարող է Անահիտ Մանասյանը, լինելով գլխավոր դատախազի տեղակալ, զբաղվելու մարդու իրավունքների պաշտպանությամբ. «Տպավորություն է, որ գլխավոր դատախազությունն իր կառուցակարգերով ու էությամբ մի կառույց է, որն ի բնե զբաղվում է մարդու իրավունքների ոտնահարմամբ և մարդկանց հալածելով։ Տպավորություն է, որ իրավական պետության մեջ կա դեմոնիզացված մի կառույց, որն զբաղված է մարդկանց հետապնդելով, և կան ուրիշ մարդիկ, որոնց զբաղվում է հետապնդվածների իրավունքներով։ Դատախազությունն իրավական պետության կառուցակարգերի տրամաբանությամբ ևս իր գործունեության ընթացքում առաջնորդվում է իրավունքների պաշտպանությամբ»,- ասաց նա։
Նա անդրադարձավ նաև ԱԺ ՄԻՊ հանձնաժողովի նիստին, ապա, դիմելով «Հայաստան» խմբակցությանը, նշեց. «Ենթադրենք, ձեր երկու պատգամավորներից մեկը գործուղման էր, մյուսը՝ վատառողջ։ Բայց ԱԺ կանոնակարգ օրենքը չի արգելում, որ ձեր խմբակցության մյուս պատգամավորները մասնակցեին այդ նիստին։ Կարո՞ղ էին մասնակցել, այո, կարող էին։ Ինչո՞ւ չեն մասնակցել։ Թույլ տվեք ենթադրել՝ ձեր թեկնածուն, լսելով նրա հանրային խոսքը, հետագիծը, քաղաքական մահապարտ ահաբեկչի է հիշեցնում, որ իրեն ուղարկում եք մի տեղ, և նա պատրաստ է գնալ ու պայթել։ Հայտնի բան է՝ երբ որևէ մեկն ահաբեկչություն է կազմակերպում, ուրիշի միջոցով իրականացնելիս ինքը չի հայտնվում ահաբեկչության վայրում»։
Հիշեցնենք՝ ընդդիմությունը ՄԻՊ պաշտոնում առաջադրել էր Էդգար Ղազարյանի թեկնածություն։