Կառավարության նիստում Քննչական կոմիտեի նախագահ Արգիշտի Քյարամյանն անդրադարձել է զորամասում տեղի ունեցած հրդեհի հնարավոր վարկածներին։
«Գիշերը ժամը 1.30-ի սահմաններում ՊՆ-ի զորամասերից մեկի մեկ վաշտի տեղակայման վայրում հրդեհ է բռնկվել: Դեպքի առթիվ նախաձեռնվել է վարույթ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որը անզգուշությամբ առաջացրել է 2 և ավելի անձի մահ»,- ասաց Քննչական կոմիտեի նախագահ Արգիշտի Քյարամյանը:
ՔԿ նախագահի խոսքով՝ դեպքի վայրում են գտնվում քննչական խմբի անդամները.
«Նրանք ողջ գիշեր աշխատել են, ներգրավվել են նաև փորձագետներ և կա նախնական վարկած առ այն, որ հրդեհը տեղի է ունեցել ջեռուցման հետ կապված հարցում անվտանգության կանոնների խախտման պատճառով: Դա նախնական վարկածն է, որն այս պահի դրությամբ հիմնավորվել է»,- նշեց ՔԿ ղեկավարը։