Նիդերլանդների կառավարությունը հայտարարել է Սանկտ Պետերբուրգում իր հյուպատոսությունը փակելու մասին։ Միաժամանակ, Նիդերլանդները կսահմանափակի Հաագայում Ռուսաստանի դեսպանատանը աշխատող ռուս դիվանագետների թիվը: Կփակվի նաև Ամստերդամում Ռուսաստանի առևտրային ներկայացուցչությունը․ հայտնում է BBC-ն։
Նիդերլանդների ԱԳՆ ղեկավարը մեկնաբանել է, որ դա արվում է Ռուսաստանի մշտական փորձերի պատճառով՝ դիվանագիտական միջավայր մտցնել լրտեսներին․ «Ռուսաստանը շարունակում է դիվանագիտության քողի տակ գաղտնի հետախուզական գործակալներին Նիդերլանդներ բերել: Մենք դա չենք կարող և թույլ չենք տա»,- հայտարարել է Նիդերլանդների արտգործնախարար Վոպկե Հոկստրան՝ հավելելով․ «Միևնույն ժամանակ, Ռուսաստանը հրաժարվում է վիզա տրամադրել հոլանդացի դիվանագետներին, ովքեր կաշխատեն Սանկտ Պետերբուրգի հյուպատոսությունում կամ Մոսկվայում՝ դեսպանատանը»։
