Այսօր տարադրամի փոխարժեքները հերթական ռեկորդն են գրանցել։ Նվազել է դոլարի, եվրոյի և մասամբ նաև ռուսական ռուբլու փոխարժեքը։ Ընդհանրապես 2022 թվականի անցած 9 ամիսների ընթացքում նկատվել է դրամի արժևորում։
Հայաստանում տարադրամի փոխարժեքը միշտ ուղղակիորեն անդրադարձել է գրեթե բոլոր ապրանքատեսակների գնի վրա։ Օրինակ, երբ դրամը սկսել է արժեզրկվել՝ օրերի և նույնիսկ ժամերի ընթացքում շուկայում նկատվել է գրեթե բոլոր ապրանքատեսակների կտրուկ թանկացում։ Տնտեսվարողների պարզաբանումը եղել է այն, որ դոլարը, կամ եվրոն թանկացել են հետևաբար իրենց ապրանքը նույնպես պետք է թանկ վաճառվի։ Եվ կարևոր չէ՝ տարադրամի թանկացումը միջազգային շուկաներում հենց այդ պահին ազդել է ապրանքների գնի վրա թե չէ։ Հայաստանում տնտեսվարողները, սկսած բենզին ներկրող և վաճառողներից, վերջացրած շուկայում կարտոֆիլ և կաղամբ վաճառողներից, միանգամից սկսում են թանկացնել իրենց ապրանքները։
Սակայն Հայաստանը թերևս ամբողջ աշխարհում առանձնանում է նրանով, որ փոխարժեքով պայմանավորված ապրանքների թանկացման արագությունը միանգամից կորում է, երբ տարադրամը սկսում է էժանալ։
Արդեն տևական ժամանակ դոլարի և եվրոյի փոխարժեքը նվազում է, սակայն Հայաստանում ապրանքների գնի նվազում չի նկատվում։ Հենց սա է հայկական ավանդական սպեկուլյացիան, որից օգտվում են տարատեսակ մանր ու խոշոր վաճառողները, իսկ զոհը դառնում են շարքային սպառողները, հիմնականում՝ կայուն աշխաըտավարձով ապրող մարդիկ։
Թե ինչու դոլարի և եվրոյի փոխարժեքի նվազման դեպքում ապրանքների, հատկապես ներկրվող ապրանքների գները չեն նվազում՝ հոդաբաշխ պարզաբանում երբևէ չի հնչել։ Այս օրերին, թե պետական կառույցները, թե փոխարժեքով պայմանավորված գերշահույթ ստացող տնտեսվարողները լուռ են։ Լուռ են, որովհետեև զբաղված են գերշահույթներ ստանալով։