Սևակ Խանաղյանի՝ 2023 թվականի առաջին մենահամերգը հայրենիքում սպասված էր իր երգարվեստի սիրահարների համար:
FoodPark by Downtown-ի դահլիճը լեփ-լեցուն էր դեռ համերգի մեկնարկից առաջ: Երեկոյի ամենասկզբում եւ ավարտին դիջեյական վահանակի մոտ էր Dj Jokey-ը, որն ակտիվ ռիթմերով պարեցնում էր ներկաներին:
Նոր մենահամերգ ու ավելի շատ հեղինակային երգեր. Սևակն, իհարկե, համերգը սկսեց ուրախ նոտաներով՝ «Сияй» երգով ու աստիճանաբար կլանեց ողջ դահլիճը: Հոտնկայս հանդիսատես, բարձր ծափահարություններ, վանկարկող և նրա հետ երգող երկրպագուներ: Երգիչը երաժիշտների կենդանի նվագակցությամբ կատարեց իր հիթերը՝ «Беги», «Без тебя не так», «Если вдруг», «Դու ես իմ հոգին», «Километры»…
Յուրահատուկ ձայն ու կատարողականություն, էմոցիոնալ պոռթկումներ, կենդանի հնչողություն ու լուսային շոու. Ընդնանուր առմամբ հնչեց երկու տասնյակից ավելի երգ, որոնց մեծ մասը հեղինակային են:
Օրվա հիշարժան պահերից էր, երբ Սևակ Խանաղյանը բեմ հրավիրեց համերգի կազմակերպիչ Լիանա Խաչատրյանին, ում սիրելին նրան բեմում ամուսնության առաջարկություն արեց:
Ռուսաստանաբնակ երգիչը շնորհակալություն հայտնեց հանդիսատեսին և ոգևորությամբ նշեց. «Ես տեսնում եմ ձեր վառվող աչքերը։ Շնորհակալ եմ, որ ժամանակ եք գտել եւ այստեղ եք»:
Հույզերը գագաթնակետին հասան, երբ հնչեցին երգչի ամենասիրված «Արցախ», «Не молчи» երգերը. նրան ձայնակցում էր ողջ դահլիճը:
90 րոպեն շատ արագ անցավ, իսկ երբ հնչեց Սևակի այցեքարտ համարվող երգերից «Жди меня там»-ը` ներկաները ձայնակցելով հրաժեշտ տվեցին՝ նորից հանդիպելու ակնկալիքով:
