Գունեղ օդապարիկներն այս օրերին զարդարում են Հայաստանի երկինքը․ Երևանի ծննդյան օրը մայրաքաղաքի երկնքում բարձրացված շուրջ 20 օդապարիկով մեկնարկել է «Բացահայտիր Հայաստանը երկնքից» միջազգային փառատոնը:
Այս տարի փառատոնին մասնակցում են շուրջ 20 օդապարիկներ Հայաստանից, Ռուսաստանից, Բուլղարիայից, Գերմանիայից, Լիտվայից, Լեհաստանից, Ճապոնիայից, Մեծ Բրիտանիայից և Վրաստանից:
«Սքայբոլ» ավիաընկերության տնօրեն Նաիրի Բարսեղյանի փոխանցմամբ՝ փառատոնը բաղկացած է 2 փուլից՝ ցուցադրական և մարզական։ Ցուցադրական փուլն իր մեջ ներառում է օդապարիկների ազատ թռիչքներ Երևանի, Գառնու, Ապարանի օդային տարածքում։
Երևանի թռիչքները սկսվել են Հանրապետության հրապարակից՝ արևածագին և մայրամուտին։ Մայրաքաղաքի բնակիչներն ու հյուրերը հավաքվել էին սեփական աչքերով տեսնելու գունեղ երկինքը։ Իսկ օդապարիկներում մասնակիցները հնարավորություն ունեն 1500 եւ ավելի մետր բարձրությունից վայելելու թամանյանական Երևանը։ Իսկ վայրէջքից հետո ստացել են պատվոգրեր։
Ցուցադրական թռիչքներից մեկը նվիրված էր Արցախից բռնի տեղահանված երեխաներին, որոնց նույնպես ներգրավել են․ «Արդեն մարզական փուլի ժամանակ յուրաքանչյուր օդապարիկի անձնակազմ պետք է իրականացնի պահանջվող առաջադրանքը, որի արդյունքում կընտրվեն հաղթողներ»,- նշել է Նաիրի Բարսեղյանը։
«Բացահայտիր Հայաստանը երկնքից» օդագնացության փառատոնն արդեն 5-րդ անգամ է անցկացվում։ Առաջինն անցկացվել է 2017 թվականին։ «Sky Club»-ի թիմը նպատակ ունի օդագնացության փառատոնի աշխարհագրությունն ընդլայնել, ավելի մեծ թվով մասնակիցներ ներգրավել՝ այն դարձնելով ամենամյա։