Վարչապետ Նիկոլ Փաշինյանն անդրադարձել է ԼՂ կարգավիճակի վերաբերյալ միջազգային հանրության ընկալմանը և Ղարաբաղին բանակցային գործընթացից դուրս թողնելուն։ Ըստ նրա՝ ՄԱԿ ԱԽ 5 մշտական անդամներից 4-ը, ԵԱՀԿ ՄԽ երկրները դիրքորոշում են հայտնել, թե Լեռնային Ղարաբաղը կարող է բարձր ինքնավարություն ստանալ Ադրբեջանի կազմում։
Նա նաև նշել է, թե Ղարաբաղին բանակցային գործընթացից հեռացնելը տեղի է ունեցել Ռոբերտ Քոչարյանի նախաձեռնությամբ: Սրա մասին են վկայել ԵԱՀԿ ՄԽ ֆրանսիացի համանախագահ Բեռնար Ֆասյեն, ՌԴ ԱԳ նախարար Սերգեյ Լավրովը, Հայաստանի առաջին նախագահ Լևոն Տեր-Պետրոսյանը և ինքը՝ Ռոբերտ Քոչարյանը, 2004թ. ապրիլի 3-ին «Գոլոս Արմենիի» թերթի ընթերցողների հարցերին պատասխանելիս։
«Որ Ռոբերտ Քոչարյանի՝ նախագահ դառնալու պահին ԼՂ-ն բանակցությունների լիարժեք կողմ էր, ապացուցվում է այն փաստով, որ ԼՂ հակամարտության կարգավորման, այսպես կոչված, ընդհանուր պետության փաթեթը ԵԱՀԿ ՄԽ համանախագահները 1998թ. նոյեմբերին ներկայացրել են ոչ միայն ՀՀ-ին ու Ադրբեջանին, այլև՝ ԼՂ-ին։ Այդ ժամանակ Քոչարյանը Հայաստանի նախագահն էր արդեն հինգ ամիս, բայց սա վերջին փաթեթն էր, որ համանախագահողների կողմից ներկայացվեց նաև ԼՂ-ին, դրանից հետո այլևս ԼՂ-ին փաթեթ չի ներկայացվել, և ԼՂ-ն, փաստացի, նույնիսկ նորմալ տեղեկացված չի եղել, թե ինչի շուրջ են ընթանում բանակցությունները»,- ասաց նա։
Նիկոլ Փաշինյանի խոսքով` Ռոբերտ Քոարյանի նպատակն այն էր, որ միջազգային հանրությունը չնկատի 1998 թ. ՀՀ–ում իր կողմից` իշխանությունը ընտրակեղծիքներով զավթելու հանգամանքը. «Ահա, թե որն Քոչարյանի մոտիվացիան` ԼՂ–ն դուրս թողնել բանակցություններից։ Իմ կարծիքով` Քոչարյանը 1998 թ. ընտրությունները հաղթեց կեղծիքների մասին համատարած ահազանգերի պայմաններում։ ՀՀ նախագահ ընտրվելու իրավունք չուներ, քանի որ վերջին 10 տարում չէր համարվել ՀՀ քաղաքացի։ Ասել է, թե Քոչարյանը ՀՀ նախագահի պաշտոնը զբաղեցրեց լեգիտիմության լիակատար բացակայությամբ»։