ՀՀ վարչապետ Նիկոլ Փաշինյանը կառավարության այսօրվա նիստում անդրադարձել է Հայաստանից Արցախ հումանիտար բեռներ ուղարկելու որոշմանը՝ հիշեցնելով, որ բեռնատարները Կոռնիձորի մոտ կանգնած են։
Նա անդրադարձել է նաև Ադրբեջանի նախագահ Իլհամ Ալիևի՝ օրերս «Եվրոնյուզ» գործակալությանը տված հարցազրույցին. «Հայտարարելով, թե իբր Ադրբեջանը ՀՀ-ից տարածքային պահանջներ չունի, Ադրբեջանի նախագահն ասում է, թե Հայաստանի և Ադրբեջանի միջև սահմանները որոշված չեն։ Հայաստանի և Ադրբեջանի միջև սահմանները որոշվել են 1991թ. Ալմա Աթայի հռչակագրով, և դա վերահաստատվել է 2022թ. հոկտեմբերի 6-ի Պրահայի քառակողմ հանդիպման արդյունքներով, որտեղ Ալմա Աթայի հռչակագիրն ընդունվել է որպես երկու երկրների միջև սահմանազատման և սահմանագծման հիմք։ Տպավորություն է ստեղծվում, թե Ադրբեջանի պլանը հետևյալն է՝ ՀՀ և Ադրբեջանի միջև Ալմա Աթայի հռչակագրով ֆիքսված սահմանը վիճարկելու տեղ թողնող դրույթներով խաղաղության պայմանագիր ստորագրել, և հետագայում արդեն սահմանազատման ու սահմանագծման գործընթացում տարածքային պահանջներ առաջադրել ՀՀ-ին»,- ասել է նա՝ հավելելով, որ եթե երկու երկրների սահմանները որոշված չեն, ի՞նչ տարածքների հարց է բարձրացնում Ադրբեջանը սահմանի տարբեր հատվածներում։
«Եթե սահմանների հարց բարձրացվում է, ուրեմն սահմանները որոշված են, իսկ այդ սահմանի գծից զորքերի հայելային հետքաշման՝ մեր առաջարկը շարունակում է մնալ ուժի մեջ»,- ասել է նա։