Եվրախորհրդարանի ֆրանսիացի անդամների հրավերով Զինվորի տան տնօրեն Հայկուհի Մինասյանը և բժշկական համալսարանի ռեկտոր Արմեն Մուրադյանը դեկտեմբերին կմեկնեն Փարիզ: Մասնակցելու են միջկուսակցական միջոցառման, որն ըստ հրավերի նամակի՝ հանձնառու է արտահայտել ֆրանսիական բոլոր քաղաքական կողմերի ընդհանուր աջակցությունը Հայաստանին՝ մեկ նպատակով. հրավիրել լրատվամիջոցների և քաղաքական գործիչների ուշադրությունը՝ ներկայում Հայաստանի առջև ծառացած սպառնալիքների վրա:
Հրավիրող կողմը պատրաստվում է միջոցառման ընթացքում կենտրոնանալ երեք հիմնական հարցերի վրա՝ պատերազմի հետևանքները Հայաստանի և տարածաշրջանի վրա, հայ գերիների վերադարձը, զինվորների վերականգնումը և հայկական մշակութային ժառանգության պահտպանությունը Լեռնային Ղարաբաղում:
Դեկտեմբերի 6-ին, Փարիզում կայանալիք միջոցառման ժամանակ Հայկուհի Մինասյանը և Արմեն Մուրադյանը հանդես կգան որպես կլոր սեղանի բանախոսներ, կներկայացնեն Երևանում զինվորների վերականգնման ուղղությամբ կատարված և կատարվող աշխատանքները:
