Պայմանավորվում ենք առաջիկայում կարգավորել սահմանազատման,սահմանագծման ուղղությամբ աշխատանքները, եռակողմ բանակցությունների մեկնարկին ասել է Ռուսաստանի նախագահը: Հայաստանի վարչապետն էլ ընդգծել է, որ Հայաստանը պատրաստ է սկսել սահմանների սահմանազատման եւ սահմանագծման գործընթացը:
«Մենք անկեղծորն շահագրգռված ենք տարածաշրջանում հաղորդակցությունների բացմամբ եւ ապաշրջափակմամբ: Մեր գնահատականն այն է, որ ադրբեջանական զորքերը ներխուժել են հայաստանի ինքնիշխան տարածք: Իհարկե, սահմանները չեն սահմանազատվել եւ սահմանագծվել, բայց պետական սահմանը կա եւ այն Հայաստանի հանրապետության ինքիշխան տարածքն է»,-նշել է Նիկոլ Փաշինյանը:
Նիկոլ Փաշինյանը նշել է նաեւ, որ 2020 թվականի նոյեմբերի եռակողմ հայտարարության ոչ բոլոր կետրն են իրականացվել: Փաշինյանը հիշեցրել է, որ պատանդների եւ այլ կալանավորների, ռազմագերիների խնդիր կա, եւ դա շատ կարեւոր մարդասիրական խնդիր է:
«Բայց ես ուզում եմ ասել, որ մենք այսօր հավաքվել են ոչ թե որպեսզի միայն բարձրաձայնենք խնդիրները, այլև քննարկենք դրանց լուծման հարցը: Ես նույնպես բազմիցս հայտարարել եմ, որ Հայաստանը պատրաստ է սկսել դելիմիտացիայի և դեմարկացիայի գործընթացը: Ապաշրջափակման և տրանսպորտային ու տնտեսական կապերի բացման թեման նույնպես շատ կարևոր է մեզ համար, և մենք անկեղծորեն շահագրգռված ենք լուծելու այդ հարցերը»,- նշել է Հայաստանի վարչապետը:
ՌԴ նախագահ Վլադիմիր Պուտինը նշել է, որ Լեռնային Ղարաբաղում տրանսպորտային ենթակառուցվածքի ապաշրջափակման վերաբերյալ որոշումներ կարող են շուտով ընդունվել:
«Հայաստանի, Ադրբեջանի և Ռուսաստանի կառավարությունների փոխվարչապետների մակարդակով ստեղծվել է եռակողմ հանձնաժողով։ Գործընկերներս զեկուցեցին, թե ինչպես է ընթանում աշխատանքը. հեշտ չէ, բայց, այնուամենայնիվ, առաջադեմ վիճակում է», – նշել է Պուտինը:
Ադրբեջանի նախագահ Իլհամ Ալիեւն էլ նշել է, որ ռուս խաղաղապահների պատասխանատվության գոտում իրավիճակը կայուն է, լուրջ միջադեպեր, նպատակաուղղված սադրանքներ չեն եղել: Ըստ նրա այն եզակի դեպքերը, որոնք արձանագրվել են, ոչ պարբերական բնույթ են կրել:
Ալիևը հայտարարել է, որ Ադրբեջանը տարվա ընթացքում առավելագույն կառուցողականություն է ցուցաբերել՝ պատերազմի հետևանքները չեզոքացնելու, ենթակառուցվածքներն ապաշրջափակելու գործում։
Ադրբեջանի նախագահը նշել է, որ պատրաստ է սկսել սահմանների դելիմիտացիայի գործընթացը՝ շեշտելով, որ այդ դեպքում Հայաստանն ու Ադրբեջանը պետք է փոխադարձաբար ճանաչեն միմյանց տարածքային ամբողջականությունը, ինքնիշխանությունը։