ՌԴ արտաքին գործերի նախարար Սերգեյ Լավրովը ապրիլի 8-ին Մոսկվայում բանակցություններ կանցկացնի ՀՀ արտաքին գործերի նախարար Արարատ Միրզոյանի հետ։ Այս մասին տեղեկացրել է Ռուսաստանի ԱԳ նախարարության պաշտոնական ներկայացուցիչ Մարիա Զախարովան:
Ըստ Զարախարովայի Արարատ Միրզոյանը աշխատանքային այցով ժամանելու է ՌԴ։
«Ապրիլի 8-ին Մոսկվայում նախատեսվում են Ռուսաստանի Դաշնության և Հայաստանի Հանրապետության արտաքին գերատեսչությունների ղեկավարների բանակցությունները։ Հայաստանի ԱԳ նախարարը Ռուսաստանում կգտնվի ՝ աշխատանքային այցով»,- ասել է Զախարովան։
Նա նշել է, որ արտգործնախարարները ծրագրում են մանրամասն քննարկել բոլոր ոլորտներում երկկողմ գործակցության ամրապնդման, նաև ընդհանուր ինտեգրացիոն միություններում՝ ԵԱՏՄ-ում, ՀԱՊԿ-ում, ԱՊՀ-ում փոխգործակցության խորացմանն ուղղված հետագա քայլերը:
«Բացի այդ, պարտադիր կերպով մտքեր են փոխանակվելու Հայաստանի, Ադրբեջանի և Ռուսաստանի ղեկավարների՝ 2020 թվականի նոյեմբերի 9-ի և 2021 թվականի հունվարի 11-ի ու նոյեմբերի 26-ի համաձայնությունների կյանքի կոչման ընթացքի վերաբերյալ: Ակնկալում ենք, որ Մոսկվայում առաջիկա բանակցությունները կնպաստեն Երևանի հետ դաշնակցային փոխգործակցության խորացմանը, Հարավային Կովկասում խաղաղության ու կայունության առաջխաղացմանը»,- հայտարարել է Զախարովան:
