Այսօր պաշտոնապես շահագործման է հանձնվել Հայաստանի և Վրաստանի պետական սահմանի Բագրատաշեն անցակետի կամուրջը։
Կամուրջի բացման պաշտոնական արարողությանը մասնակցելու են Հայաստանի և Վրաստանի վարչապետները։
Կամուրջը կառուցվել է Վերակառուցման և զարգացման եվրոպական բանկի աջակցությամբ։ Վարկային համաձայնագիրը ստորագրվել է 2012թ. նոյեմբերի 23-ին, որից հետո 2014 դեկտեմբերի 24-ին Հայաստանի Հանրապետության և Վրաստանի կառավարությունների միջև կնքվել է միջկառավարական համաձայնագիր, որով ստեղծվել է միջկառավարական հանձնաժողով՝ ծրագիրը ՀՀ և Վրաստանի կողմից համատեղ իրականացնելու նպատակով:
Կատարվել են հիմքերի հորատման, հիմքերի և հենապատերի ամրանավորման և բետոնացման, թունելային անցումների բետոնացման աշխատանքները: Տեղադրվել են կամուրջների 50 նախալարված ամրաններով հեծանները, կատարվել են ամրանավորման և բետոնացման, մակերեսի ասֆալտապատման աշխատանքներ։ Իրականացվել են լուսավորության և ջրահեռացման համակարգերի մոնտաժման աշխատանքներ։ Տեղադրվել են արգելափակոցները, ասֆալտապատվել են մայթերը և մոտեցնող ճանապարհները, ավարտվել են ճանապարհային նշանների և գծանշման աշխատանքները։ Ծրագրի շրջանակներում անցակետում տեղադրվել է 6X10մ չափերով ՀՀ դրոշը՝ 30 մետր բարձրությամբ մետաղական սյան վրա։
Փաստացի կատարված է պայմանագրային աշխատանքների 100%-ը։
Շինարարության փուլի մեկնարկը տրվել է 2021 թվականի մայիսի 13-ին։ Ծրագրի կապալառուն է՝ «Թունել Սադ Արիանա» ՓԲԸ։
Շինարարության համար պայմանագրով նախատեսված էր 12 ամիս ժամկետ, որից հետո Ինժեների կողմից ժամկետը երկարաձգվել է 48 օրով։
Կապալառուին մինչ այժմ վճարվել է 2,738,309,14 եվրո՝ ներառյալ 739,334.79 եվրո կանխավճար, իսկ Տեխնիկական վերահսկողին 526,386.58 եվրո։
Նոր կամուրջը կավելացնի սահմանային անցման կետի թողունակությունը։