Ստրասբուրգում ապրիլի 19-ին մեկնարկում է Եվրոպայի խորհրդի Խորհրդարանական վեհաժողովի գարնանային նստաշրջանը: Այն անցկացվելու է հիբրիդային ձևաչափով: Օրակարգը հրապարակված է ԵԽԽՎ կայքում:
Գարնանային նստաշրջանում, մասնավորապես, նախատեսված են Գերմանիայի կանցլեր Անգելա Մերկելի և Գերմանիայի արտաքին գործերի նախարարության եվրոպական հարցերով պետնախարար Միխայել Ռոթի ելույթները: Նախատեսված են նաև Եվրախորհրդարանի նախագահ Դավիդ Սասոլիի, Մոլդովայի Հանրապետության Նախագահ Մայա Սանդուի և կազմակերպության գլխավոր քարտուղար Մարիա Պեյչինովիչ-Բուրիչի ելույթները:
Ակնկալվում է նաև, որ մարդու իրավունքների հանձնակատար Դունյա Միյատովիչը կներկայացնի իր տարեկան տարեկան զեկույցը:
Նստաշրջանը կավարտվի ապրիլի 22-ին:
Հիշեցնենք, որ երեկ՝ ԱԺ ԲՀԿ խմբակցության պատգամավոր Նաիրա Զոհրաբյանը տեղեկացրել էր, որ ԵԽԽՎ գարնանային նստաշրջանում մի քանի քաղաքական խմբերի նախաձեռնությամբ կքննարկվի նաեւ հայ ռազմագերիների հարցը։
