ՀՀ երկրորդ նախագահ, «Հայաստան» դաշինքի ղեկավար Ռոբերտ Քոչարյանը, տարեվերջյան մամուլի ասուլիսի ժամանակ կատարյալ ձախողում է գնահատել 2021 թվականը։ Նա նշել է, որ այս տարվա ընթացքում ոչ մի հարց չի բարելավել։
Քոչարյանի խոսքով՝ իշխանությունները խոսում են 40 քկմ տարածքի մասին, որը թշնամու վերահսկողության տակ է, բայց իրականում չենք վերահսկում շատ ավելի մեծ տարածքներ։
«GPS-ով սահմանագծումը բերեց նրան, որ ադրբեջանական զորքերը դիրքավորվել են ենթադրյալ իրենց սահմանի բերանով։ Մենք ստիպված ենք եղել առնվազն հետ քաշվել 500 մետրից մինչև 1-1․5 կմ, որոշ տեղերում մի քիչ ավելի շատ։ Նույնը կատարվել է Վարդենիսի հատվածում, նաև Նախիջևանի հատվածում։ Ամբողջ այդ տարածքը՝ իրենց դիրքերից մինչև մեր դիրքեր, մեր կողմից չեն վերահսկվում։ Ստացվում է՝ մենք կորցրել ենք վերահսկողությունը ոչ միայն այդ 40 քկմ տարածքի նկատմամբ, այլ տասնապատիկ ավելի մեծ տարածքների նկատմամբ»,-ասել է Ռոբերտ Քոչարյանը։
ՀՀ երկրորդ նախագահը նաեւ նշել է, որ այս տարի կորցրել ենք կարևորագույն ճանապարհների օգտագործման հնարավորությունը։ Ըստ նրա ոչինչ չի արվել բանակի մարտունակությունը բարձրացնելու համար։
«2-3 դիրքի համար մարտական գործողությունների ժամանակ 30-ից ավելի գերի ունենալը խոսում է բանակում լրջագույն խնդիրների մասին»,-ասել է Քոչարյանը։
