ԱՄՆ նախագահ Ջո Բայդենը մեկ տարով երկարաձգել է մի շարք պատժամիջոցների կիրառումը, որոնք սահմանվել են, մասնավորապես, ամերիկյան ընտրական գործընթացներին ռուսական միջամտության պատրվակով, ինչպես նաև Ուկրաինայում հատուկ գործողության մեկնարկից հետո։ Այս մասին ասվում էՍպիտակ տան տարածած փաստաթղթերում։
Նշվում է, որ Ռուսաստանի Դաշնությունը «վնասակար գործունեությամբ» է զբաղվել ԱՄՆ-ի դեմ։ Նշվում են Մոսկվայի ենթադրյալ ջանքերը՝ «խոչընդոտելու ազատ և արդար ժողովրդավարական ընտրությունների անցկացմանը և խաթարելու ժողովրդավարական ինստիտուտները Միացյալ Նահանգների, նրա դաշնակիցների և գործընկերների տարածքում», ինչպես նաև «Միացյալ Նահանգների, նրա դաշնակիցների և գործընկերների դեմ վնասակար կիբեռգործողություններին մասնակցելը և նպաստելը»:
Դրա հետ մեկտեղ, Վաշինգտոնի վարչակազմը պնդում է, որ Ռուսաստանը «խախտել է միջազգային իրավունքի հաստատված սկզբունքները՝ ներառյալ պետությունների տարածքային ամբողջականությունը», մասնակցում է «անդրազգային կոռուպցիայի խրախուսմանը և օգտագործմանը՝ այլ երկրների կառավարությունների վրա ազդելու համար»։
«Ռուսաստանի Դաշնության կառավարության վնասակար գործունեությունը շարունակում է անսովոր և արտառոց վտանգ ներկայացնել Միացյալ Նահանգների ազգային անվտանգության, արտաքին քաղաքականության և տնտեսության համար։ Այդ իսկ պատճառով արտակարգ դրությունը պետք է ուժի մեջ մնա, ուստի ես մեկ տարով երկարացնում եմ 14024 հրամանագրով հայտարարված [պատժամիջոցների] արտակարգ դրությունը»,- ասվում է Բայդենի հայտարարության մեջ։