ՀՀ առողջապահության նախարար Անահիտ Ավանեսյանն ԱԺ-կառավարություն հարցուպատասխանի ժամանակ անդրադարձել է առողջության համապարփակ ապահովագրության հայեցակարգին՝ ներկայացնելով դրա մանրամասները։
Ավանեսյանի խոսքով՝ այն ուղղված է ոչ միայն բնակչության չափորոշիչների բարելավմանն ու վաղաժամ մահացության կրճատմանը, այլև սոցիալական կարևոր երաշխիք է։ Ըստ նրա՝ առողջապահական աղետալի ծախսերը բերում են ընտանիքների աղքատացման, ծառայությունների անհասանելիության, թեև պետությունը տարեցտարի փորձում է ֆինանսական բեռը թեթևացնել։
Ավանեսյանն ասել է, որ այդ բարեփոխումն ազդելու է ոչ միայն ծառայությունների հասանելիության աճի, այլև դրանց որակական բաղադրիչի վրա. «Համակարգի կայուն ֆինանսավորումը և կանխավճարային սկզբունքը հանգեցնում է հիվանդությունների կանխարգելմանը, վաղ հայտնաբերմանը և ճիշտ ժամանակին առողջապահական ծառայությունների մատուցմանը, ինչն ավելի ծախսարդյունավետ է ու բարեհաջող ելքեր է ունենում»։
Նախարարը նշեց, որ համակարգը ներդրվելու է աստիճանաբար։ 2025թ. թոշակառուները կներառվեն պետության հաշվին ապահովագրվելու սկզբունքից ելնելով։
Ավանեսյանը շեշտել է, որ հայեցակարգում որդեգրվել է խառը ֆինանսավորման սկզբունքը. «Ուսումնասիրելով տարբեր երկրների փորձը՝ այն ամենակայուն տարբերակն է։ Առաջիկայում՝ 2024թ., ունենալու ենք միասնական ապահովագրական փաթեթ պետպատվերի շահառու բոլոր քաղաքացիների համար, այսինքն, այսօր գործող խառնիճաղանջ և մասնատված համակարգը փոխարինվելու է բոլոր շահառուների համար մեկ փաթեթով»։ Ավանեսյանի խոսքով, օրինակ՝ 2-րդ և 3-րդ կարգի հաշմանդամները չեն ունենալու տարբերակված ծառայությունների փաթեթ, այլ կլինի միասնական։
Անահիտ Ավանեսյանը նաև տեղեկացրել է, որ առաջիկայում կընդունվի առողջապահության ոլորտի հնգամյա ռազմավարություն։
